Mizoram Police an chak ta

GIG Motors MPL12-ah Mizoram Police-in hma an sawn zel a, nimin chhun khan kai thar MLS FC chu 2-1 in an hneh a, tun season MPL-a an chakna hmasa ber a ni. Lalbiaksanga Colney hote tan Lalbiakhlua (Hlutea) leh F. Lalrinpuia (Valpuia) ten goal an khung a, Lawngtlai club tana M. Lalpektluanga goal in result a tidanglam pha lo.

Police player-te kum a upa deuh tawh a, an thiamna erawh a la ngai reng. CYMA Football 2025-a Republic Veng champion puitu Valpuia pawh MPL tan a la ṭha reng a, MLS tlarhnung tan a la hnawksak hle.

Midfielder ball pet thiam bik R. Malsawmtluanga ke vei lam pawhin a thiam thil a la theihnghilh lo a, freekick aṭanga a ball pet chu Hlutea'n minute 25-naah a tauh goal. Police an phur chhunzawm a, minute hnih hnuah Lalbiakhlua (Biaktea) cross ṭha chu Valpuia'n MLS defender-in uluk taka an veng chungin a tauh goal tho. Valpuia hian halfway line pelh hret aṭangin a pet goal ṭep a, second half-ah pawh box chhungah chance insiamin ṭha takin pet mah se keeper Telawma'n a dang ve ve.

Second half-ah MLS an insiamṭha a, goal hmaah an vannei tawk lo a, goalkeeper F. Lalmuanawma a khel ṭha hrim hrim bawk. Substitute K. Lalremmuana'n hnai tak aṭangin a khung lo a, M.Peka'n mahni hma sial lo takin Lalhruaitluanga pe mah se Thingkah tlangval Hruaitea'n a khawih fuh hman lo.

Minute 88-naah Ngurthanmawia cross chu M.Peka'n a khung a, MLS-in point hmuh beiseina nei chhunzawmin hun tawp lam inkhel a nung. Police an ṭangtluan a, 2-1 a chakin point thum hlu tak an hlawh chhuak.