Aizawl West Derby kan nghak chhuak ta; Kananin engtik lai mahin min pha dawn lo - Dinthar GS

Mizoram chhunga football inelna sang ber GIG Motors MPL12-ah vawiin chhun dar 12:00 hian Kanan FC leh Dinthar FC te RG Stadium-ah an inkhel dawn. Match hmasa berah club pahnih hi an chak ve ve a, hei hian Aizawl West Derby hmuhnawmna a belhchhah ang.

Cho leh cho

I Day Football-ah derby match hi hmuh ni lo mah se MPL KickOff-ah derby boruak a inṭan a, Chanmari YMA Hall boruak a 'hot' nghal. Dinthar general secretary Johny Lalrinchhana chuan, "A let fein Dinthar chuan fans kan ngah dawn chiang sa a, Kanan chuan engtiklai mahin min pha ngai dawn lo hrim hrim a ni," tiin an veng ṭhenawm Kanan aia ṭantu an ngah zawk tur thu a sawi.

Dinthar hi MPL champion hmasa ber an ni a, Mizoram chhung football inelna sang berah sulhnu nei ṭha zawk an ni. Mahse, MPL12-ah chuan team pahnih hi kai thar ve ve an ni a, an intluk tawk viau tura ngaih an ni.

Kanan FC vice chairman Lalramnghaka Pautu (Anghaka) chuan, "Theihtawp kan chhuah ang a, kan chak ngei ka ring," tiin Aizawl West Derby chungchang a sawi thung a, sawi ve satliah ni loin a rilru tak tak a sawiah a ngaih theih.

Khelmual inbeihna

Dinthar hi I Day Football aiin an ṭha tawh zawk a, tlarhnungah Chanmari aṭangin Lalhmangaihsanga an la lut. Defender chak ṭha Hmangaihsanga hian MLS FC lakah freekick a khung a, player of the match-ah an thlang nghal bawk.

Maimawms hian boruak sanga khel ṭha ṭhin R. Laldanmawia leh MS Dawngliana te an kawl a, MPL hmasa ber best forward Dawngtea hian MPL season 11 khel tawh mah se MPL12-ah freekick aṭanga a goal hmasa ber a khung a, upat lamah a rilru fim chhoin goal hmaah a hriam belh zel.

Laldampuia hian player upa chauh kawl loin mual sir aṭanga nawr nan player la chak ṭha Ricky Lalramnghaka, Jerry Lalchhanchhuaha leh Lalrintluanga (Tutua) te a nei a, Kanan FC tan buaipui tham an ni dawn.

Mahse, an match hmasa ber aṭanga thlir chuan Chawngthansanga kaihhruai Kanan FC an insiamṭha zawk. Kanan hian I Day Football-a an hneh loh Saikhamakawn FC chu Lalthanpuia (Tepuia) goal hmangin an hneh a, Lalsangzuala Hmar hoten chance an insiam thei lo. Chawnga hote hi goal hmaah vannei se, goal khat aia tam khung ngei tur an ni.

Kanan hian MPL khelh hmasak berah champion tumin player pawh an inla lut ṭha a, goalkeeper Malsawmkima (Mana) chu Police lakah chân mah se MPL tawnhriat nei tho V. Lalthlamuanpuia (Puia) a rintlak nghal. Kil tinah Kanan an pangngai a, tlarhma hi an ṭhat lehzualna a ni.

Tlarhamah Tepuia, Lalthanzuala leh F. Lallawmkima te an dah thei a, Mizoram kawr ha tlak tur vek niin bench aṭangin First Division-a kum hnih a zawna top scorer ni thei Lalthuthlunga a la awm. Midfield-ah tualchhung football-a tawnhriat nei ṭha K. Lalhmangaihkima'n a uap thei a, Kanan hi Dinthar hneh turin an ṭha tawk.