ICU-a awm Police an ngaihtuahawm!

GIG Motors MPL12-ah finalist ni lai Mizoram Police dinhmun a ṭha lo. Lalbiaksanga Colney hote hian match hmasa berah Aizawl FC 5-0 in an hneh lo a, vawiin tlai dar 3:00 hian I Day Football-a Aizawl FC hnehtu leh I League club tho Chanmari FC an hmachhawn dawn. Mualpho nawn thei dinhmunah Police an ding.

RG Stadium-a Police leh Chanmari inkhel hi Zonet Youtube (member tan), Empai leh Rihnim hmangin a en theih dawn a, BS-a hote fiahin an awm dawn. Chutihrualin Police hming lam ruala zam tawk an nih erawh chuan Chanmari pawh chesual ve thei tho an ni.

Police hian an match hmasa bera Aizawl FC an hneh loh ṭumin recruitment thar bera an lakluh player pakhatmah bul ṭantu zingah an tel lo a, kum 30 ral kai deuh vek an nih tawh avangin an tha a ṭhum ve tawh. Ṭum dang angin an goal bawh a na tawh lo a, an ball chuh pawh a na chuang lo.

Chutihrualin ke vei lama ball pet thiam bik R. Malsawmtluanga leh F. Lalrinpuia te an kawl avangin freekick aṭang chuan an la hlauhawm reng a, mah se open play aṭanga goal khung erawh an harsat. Chanmari lamin tlarhnungah FC Lalhmunmawia an neih belh a, I Day Football 2024-a Police champion puitu defender hian a club hlui dan chah hi a hreh dawn lo a, tun hma zawng aiin Police hneh hi a châk dawn.

Rochhingpuia kaihhruai Chanmari squad a chhah ṭha a, match hnuhnung berah awh I League kaipuitu player pawimawh Michael Lalbiaksanga leh Joel Lalramengmawia te bench-ah an dah thei. Tlarhma lamah Lalruatpuia leh PC Rosangzuala ten khelhna hmun an inchuh a, Police tlarhnung an dim lo ang. Chutihrualin Police erawh tawnhriat nei ṭha an ni a, pressure a san poh leh an ṭha ṭhin. Vawiinah BS-a kaihhruai Police dinhmun a hriat dawn e.