Buaina ngah Man United

Manchester United-in £200mtd seng tawh mah se goal khung kawngah harsatna an la nei reng a, midfield-ah chinfel tur a la awm a, goalkeeper-ah pawh an la dik chuang lo.

Ruben Amorim-a'n Arsenal an hmachhawn ṭumin Andre Onana squad-ah a dah lo a, Fulham lakah bench-ah dahin 'technical' thil vanga thlang lo a nih thu a sawi. Portuguese manager thlan zawk Altay Bayindir a khel chhe lo a, goal a chhuah danah dem theih a ni lo.

Turkish keeper hian pet chhuah ṭha tak tak a nei a, save ṭha pawh a nei a, mah se a la nghet tlat lo. United-in corner kick an chawi apiangin hlauthawnna an ngah a, Bayindir-a chet dan hian defender-te inrintawkna a pe pha lo.

Man United hian goalkeeper an la zawng reng a, Royal Antwerp nen Senne Lammens chungchangah indawrna an nei mek. Indawrna an neih thui tawh avangin Belgian Pro League-a Antwerp-in kartawpa Mechelen 2-1 an hneh ṭum pawhin kum 23 mi Lammens hi awltir a ni. Lammens hi Belgium senior team squad-ah kumin March thla khan koh ni tawh mah se a la khel lo a, eng ang chiaha rintlak nge tih hriatthiam a la har hle. A elpui tur Onana leh Bayindir te hi Cameroon leh Turkey tana khel tawh ve ve an ni thung.

Amorim-a'n midfield-ah duhkhawp a hmu lo tih a lang a, amaherawhchu an player duh loh Jadon Sancho, Alejandro Garnacho, Antony leh Tyrell Malacia te hralhna an hmuh loh vangin player thar lakna tur sum an nei bik lo. Chutihrualin United hian England tana khel thei Kobbie Mainoo pawh chhawr lohin an la dah a, an chhawr loh chhan erawh a position-a elpui thar Bruno Fernandes a tluk loh vang a ni thung. Chutihrualin Amorim-a hoten inrintawkna an hloh a, Portuguese manager ngei pawhin captain Bruno Fernandes-a penalty a pet lai a en ngam lo. Fernandes-a'n penalty a hlah chauh ni loin khelmualah a theihna a lantir pha lo.

Man United hian season ṭan hmain United States-ah Premier League club tho West Ham leh Bournemouth te a hneh thei a, Everton nen inhnehtawkin, match thum aṭangin point sarih an hmu. Amorim-a hote hian goal riat ngawt an khung a, US-a goal khung thei tak khan England-ah goal khung an harsat.

Season liam taa che ṭha tawk lo Rasmus Hojlund-a kum rualpui Benjamin Sesko an la lut a, Sesko chunga pressure chhawk turin Hojlund chhawr tumna a awm tawh lo. Sesko-a'n match hnihah goal a la khung lo a, Fulham lakah goal khung theihna tur pawh a insiam lo hrim hrim.

Amorim chuan, "Hun a la mamawh dawn. Inkhel a rang tawh ṭhin si a, bench aṭanga luh a, chet ṭhat hi a harsa a, Bundesliga aiin Premier League a rang zawk bawk. Mahse, theihtawp a chhuah a, a teammate-te nen pawh an boruak a ṭha. Kan khelh ṭhat lai takin khelmualah a lut lo a, a tan a harsa ve bawk a ni," tiin Sesko khelh dan a hriatthiam thu sawi.