Premier League record an siam!

Leeds United chuan AC Milan aṭangin striker Noah Okafor chu pound maktaduai 18-in an la lut a, Premier League record siamin a awm nghal - tihian nipui transfer-ah EPL club-ten £2.37tld an seng tling chiah tihna a ni a, heti zat sum hi transfer window khatah sen a la ni ngai lo.

Switzerland striker hian Leeds hi kum li chhung atan a zawm a, Premier League kai thar club-in tun nipuia player an lakluh pakuana chiah a ni bawk.

Kum 25 mi Okafor hian Basel leh RB Salzburg tan a lo khel tawh a, Milan tan hian match 54 khela goal sarih khungin, assist vawi nga a nei a, Leeds ṭantute chuan hei aia statistic ṭha zawk hi an club-ah chuan an beisei ang.

Premier League club-ten nipui transfer-a sum an sen hnem ber ni ṭhin chu kum 2023 kha niin, £2.36tld an seng a, mahse, tun season-ah £2.37tld sengin an khum ta - club tam zawk an la bazar zo lo a, record hi hei ai hian a sang lehzual ang.

Tun nipuiah EPL club paruk ngawtin an club transfer record an siam - champion Liverpool chuan Bayer Leverkusen aṭangin Florian Wirtz chu £100mtd-in an la lut a, a khelh ṭhat dan a zirin £16mtd an la pek belh dawn.

Brentford-in Dango Ouattara chu £42.5mtd-in an la lut a, Bournemouth chuan French centre back Bafode Diakite manah £34.6mtd an seng a, Burnley chuan French midfielder Lesley Ugochukwu tan £25mtd theh chhuakin, Sunderland-in Senegal midfielder Habib Diarra chu £30mtd+add-ons in an lei bawk.

Nottingham Forest phei chuan an club transfer record vawi hnih ngawt an siam a, Switzerland winger Dan Ndoye hmanga record an siam hnuah, Omari Hutchison chu Ipswich Town aṭangin £37.5mtd in an la lut.