Hojlund kalna tur a chiang lo

Manchester United striker Rasmus Hojlund hma hun a chiang lo zual - AC Milan chuan loan hmanga hawh an duh nia sawi a ni a, mahse Italian club hian Victor Boniface lam an hawi leh ta zawk niin khawthlang chanchinbu mite chuan an tarlang.

Man United manager Ruben Amorim-a'n Hojlund a ring ngam tawh lo a, striker thar Benjamin Sesko a duh zawk - Premier League season thar an match hmasa berah pawh Hojlund hi an khelhtir ve lo a ni.

Milan hian Hojlund hi lak an duh thu pawh an sawi tawh ngei a, mahse Bayer Leverkusen striker Victor Boniface an dawr tel bawk a, loan hmanga hawh an tum dan pawh a thuhmun bawk.

Denmark international Hojlund hi kum 22 mi chauh a la ni a, hmabak a la nei thui hle. Tharum a ngah a, tun hmain Atalanta tan a lo khelh tawh avangin Serie A a hrechiang a, a mikhual dawn lo.

Amaherawhchu, Hojlund hian khawi club nge a zawm dawn tih a la chiang thei lo a, a mimal ngaihdan bakah club pahnih inbiakremna a pawimawh dawn, inkhelh tam theihna tur hmun pan a duh ang.