Brentford-in Magpies an hnar

Tun nipui transfer zet chu Newcastle United an che hleithei lo–pound maktaduai 40-a Brentford striker Yoane Wissa an dawrna chu Premier League club hian an lo hnar leh ta a, an vawi hnih hnarna a ni.

Magpies hian Brentford hi £35mtd pek phawt a, a khelh ṭhat dan a zira £5mtd pek belh turin an dawr a, mahse, Bees hian an lo hnar. Newcastle dawrna hmasa £30mtd chu an lo hnar tawh bawk.

Season hmasaa league goal 19 khungtu Wissa hian Newcastle pan ngei hi a duh a, mahse, Brentford lam hian awlsam taka chhuahtir an tum lo–amah hi chuan social media lamah pawh Brentford kaihhnawih thil chu a paih thla tawh.

July thla khan Wissa hian Portugal-a an pre-season camp chhuahsanin, England-ah a kir a, St James' Park lama pem phalsak a nih loh chuan Brentford tan training emaw khelh leh emaw a tum tawh loh thu a sawi.

Mahse, inbiakna neih a nih hnuah club training a zawm a, boruak a zia. Wissa beisei dan chuan Brentford hian amah thlakna tur an lakluh chuan, harsatna nei loa Newcastle an pantir mai a ring.

Mahse, Brentford hian Bournemouth aṭanga club player man to ber ni tura Dango Ouattara (£42.5mtd) an lakluh chu Wissa thlakna tur a nih loh thu an sawi a, tunah a vawi hnih nan Magpies an hnar.

Brentford hian Manchester United lakah forward chhuanvawr Bryan Mbeumo chu an lo chân tawh a, hei vang hian man hniam taka Wissa chân an tum lo.