US Open atan Alcaraz inringtawk

Carlos Alcaraz chuan US Open khel turin a rilru leh taksa a inpeih tih a sawi a, tennis season khat chhunga Grand Slam hnuhnung ber khel tur hian a inpeih leh tawh hle a ni.

Spanish star Alcaraz hian Cincinnati Open final-ah Jannik Sinner hnehin nomawi a chawi, anni pahnih bawk hi US Open an khelh hunah pawh champion tura rinkai an ni leh dawn a, mipui mit fukna an ni ang.

Kum 22 mi Alcaraz chuan, "New York khawpui hi inkhelh nuam ka tihna hmun a ni. Grand Slam nomawi ka chawi hmasak berna hmun niin, min thlawptu an ṭhat ṭhin em em bawk avangin inkhelh a nuam zual.

"Tunah hian ka taksa a inpeih a, inrintawkna pawh ka nei sang hle," a ti. US Open champion a nih hnu lawkah khan world number 1 a ni zui a, kum 1973 aṭanga world ranking an siam china number 1 ni thei naupang ber a ni hial.

Season hmasa erawh kha chuan a che fuh lo, second round lekah Botic van de Zandschulp hneh loin a zinkawng a tawp; kuminah erawh inbuatsaihna a neih ṭhat avangin thlen san theih pawh a inbeisei leh ta hle.

Grand Slam vawi nga champion tawh Alcaraz chuan, "Nikuma US Open ka khelh dan kha chu a fuh lo hle, a hrehawm pawh ka ti. Kuminah erawh ka ṭhat dan takin ka khel chhuak leh mek a, beiseina pawh ka nei sang.

"Ka chet fuh lohna aṭang khan thil tam tak ka zir chhuak a, player ṭha zawk ni tura inchherna a nih bakah mi puitling zawk ka nih theihna kawng a ni ve bawk," tiin a sawi. US Open hi August 24 aṭangin an khel ṭan leh ang.

Mipa tennis thuneitu sang - Association of Tennis Professionals (ATP) chuan US Open khelh huna hman tlang tawh turin world ranking an ti chhuak a, a chung berah Sinner hi awm chhunzawmin a dawtah Alcaraz a awm bawk.

US Open champion Sinner aia Alcaraz hniam zawkna hi point 1890 chauh a ni a, season hmasa khan Spanish star hi second round-ah a tla, point humhim tur 50 chauh a nei tihna a ni a, kuminah a khel ṭha a nih chuan number 1 nih theihna remchang a nei ang.

Spanish star Alcaraz hian number 1 dinhmun a lo luah reng tawh ṭhin a, tun ṭumah hian a lehthal leh thei a nih chuan kum 2023 September hnua a chung bera a lawn lehna hmasa ber a ni thei dawn a ni.