Dinthar hmaah MLS FC

GIG Motors MPL12-ah vawiin lai dar 3:00 hian champion hmasa ber Dinthar FC leh kai thar MLS FC an hmachhawn dawn. Maimawms hian champion tumin squad an din a, Lawngtlai club MLS lakah an theihna lantir an tum dawn.

Dinthar hi Laldampuia enkawl a ni a, vawiin hi an player hlui Dampuia hnuaia MPL match hmasa ber tur a ni. Chutihrualin Lawngtlai tan hun chhinchhiahtlak a ni a, Mizorama football inelna ang bera Lawngtlai club inlan hmasak ber hun a ni thung.

I Day Football neih zawh takah MLS hian Aizawl FC leh Saikhamakawn te an hneh lo a, mahse I League club laka an chak lohna hi goal khat chauh a ni. Coach Vanlalpeka hote tan MPL-a che ṭha turin match hmasa ber result ṭha neih a pawimawh dawn a, Dinthar lakah point hmuh ngei an tum dawn.

Mahse, Dinthar hian R. Laldanmawia, MS Dawngliana, Ricky Lalramnghaka, Jerry Lalchhanchhuaha leh Samuel Lawmsiamkima te n kawl a, MPL-a tawnhriat nei ṭha vek tawh an nih vangin Lawngtlai club tlarhnung tan ven an harsa dawn. Coach Peka'n Dampuia hote dan dan tur a duan chhuah a ṭul ang.