Kananin Saikhamakawn an hneh

Kanan FC chuan GIG Motors MPL12 an match hmasa berah anmahni ang bawka kai thar Saikhamakawn chu 1-0 in an hneh a, goal awmchhun hi Lalthanpuia (Tepuia) khung a ni. Chawngthansanga hote an khel ṭha a, I Day Football semifinal-a an hneh loh Lalsangzuala Hmar hote lakah phuba an la.

Nimin tlai inkhel hi rinlawk ang ngeiin an inhnehtawk a, first half-ah goal chance hmuh tur a tam lo. Saikhamakawn an vanduai a, hliam vangin goalkeeper RS Lallawmzuala chu first half-ah thlak a ngai a, second half-ah defender Jojo chu hliam vang bawkin lak chhuah a ni leh bawk.

Kanan an khel ṭha hrim hrim a, inkhelah chungnungin goal chance pawh an ngah zawk a, minute 65-naah Tepuia'n goal ṭha bik a khung. Kanan forward F. Lallawmkima'n vei lam aṭangin ball ṭha zetin a la lut a, a ball pass ṭha chu Tepuia'n changin rilru fim takin Hunruata a bum a, kawh zetin a pet goal.

Saikhamkawnin Malsawm-dawngkima leh Kiran Chettri te freekick hmangin Kanan rum ṭhaih mah se chance hlauhawm dang an insiam thei lo a, Kanan tlarhnungin striker Suanngaihmuana an dang hneh hle. Kananin goal dang khung belhna remchang an ngah zawk a; Lalthanzuala (TZ-a) leh Lalthuthlunga ten goal tura ngaih an khung lo.

Chawnthansanga hote an khel ṭha a, an phu angin point thum hlu tak an hlawh chhuak. Saikhamakawn erawhin I Day Football final thleng mah se MPL match hmasa berah an chak lo a, insiamṭhatna tur an ngah hle.