Sawmsanga'n Chanmari a chakpui

I Day Football 2025 final-a Chanmari tana chakna goal khungtu KC Malsawmsanga'n GIG Motors MPL12-a goal hmasa ber a khung a, I League club-in SYS FC 2-0 a hnehin bul an ṭan. Rochhingpuia hote hian minute hnihna lekah Sawmsanga hmangin an khung a, minute 53-naah Sawmsanga siamsak chu Johny Lalremruata'n a khung leh bawk.

Chanmari hian August 26, Thawhlehni tlai dar 3:00 hian Mizoram Police an hmachhawn ang a, SYS FC hian August 25, Thawhṭanni tlai dar 3:00-ah Aizawl FC an hmachhawn thung ang.

A goal hma

Chanmari FC-in bul an ṭan ṭha a, vei lam aṭanga James-a vawrhluh chu SYS lamin an clear ṭha tawk lo - Lalruatdika'n anmahni box chhungah a vawrhlut. SYS tihsual hi Chanmari hian remchangah lain box chhungah winger Lalpekhlua'n ball kang chu KC Malsawmsanga tana pet nuam tawk chiahin a ti per a, Sawmsanga hian kawh zetin a pet goal.

Rawlthar rual awmna SYS hi midfield tawnhriat nei ṭha pahnih HP Lalremruata leh T. Vanlalruata ten an ho a, Chanmariin goal khung hma mah se Lunglei club an ṭang khawng ve tlat. First half-ah Oliver Lalmalsawma Khiangte hmanga siphurh sutna remchang an neih hman ṭangkai lo a, first half-ah 1-0 in Chanmariin hma an hruai.

Goal khat dang

Second half-ah pawh Chanmari bawkin bul an ṭan ṭha a, SYS tlarhnung an muthlu a, Sawmsanga'n a ball ṭha hmuh chu goal khung theihna tur ni mah se mahni hma sial miah loin Johny Lalremruata tan a pe a; Johny-a'n minute 53-naah Chanmari goal hnihna a khung.

SYS lam an beidawng lo a, siphurh sut tumin an nawr ve reng tho. Bench aṭanga lut Vanlalramnghaka'n hnai tak aṭangin a tauh lut a, Chanmari tlarhnungah Lalrinchhana Tochhawng leh FC Lalhmunmawia te inkawp an chet ṭhat avangin Lunglei club-in chance ṭha dang an nei tawh lo.

Chanmariin goal dang khung belh theihna hun ṭha an nei a, mahse an hun ṭha neih an hmang ṭangkai bik lo. Aaron Vanlalrinchhana'n cross bar pet perin Lalnunzira leh Johny ten goal ban an pet per ve ve a, Chhinga hoten goal dang khung belh tawh loin 2-0 in an chak.