Kane leh Diaz ten nomawi an chawi nghal

Harry Kane leh Luis Diaz ten Bayern Munich tan match an khel dun ta a, an match hmasa berah hiann Stuttgart chu 2-1 a hnehin German Super Cup an la nghal, nomawi dang engzat in nge zui ang tih chu zawhna a ni.

Inrinni zan khan MHPArena-ah German Super Cup hi khelh a ni a, German champion Bavarians tan Kan leh Diaz te hian goal khung ve ve an khung. Stuttgart goal neih chhun hi hun tawp dawna Jamie Leweling khung a ni a, awmzia erawh a nei tawh lo.

German football season thar khuhhawn nan Super Cup hi an hmang ṭhin a, record nei ṭha ber Bayern Munich hi vawi 11 an champion tawh. Kane tan nomawi pahnihna a ni a, season hmasa khan Bundesliga title a lak pui bawk.

Liverpool aṭanga Bayern Munich zawmtu Diaz-a'n a ṭhianpa Diogo Jota a theihnghilh lo a, a goal khung lawm danin a lawmsak - social media almah sawi zui pawh a hlawh hle a, a vuinaah khan kal ve lo mah se a theihnghilh tihna a ni bik lo.

Colombian forward hian football zinkawng thar a zawh dawn a ni a, tlarhma lama a khelh pui Kane kianga khelh chu nuam a ti nghal hle. Diaz chuan, "Bayern tana ka match pangngai hmasa berah goal ka khung a, nomawi ka chawi nghal bawk.

"Ka tan chuan hun chhinchhiah tlak tak a ni a, club ropui tak tana sulhnu ka hnut chhiah ve thei tur hi ka lawm. Bayern Munich tan hian a tam thei ang ber nomawi chawi ka tum dawn a ni. Kane nen kan inkawp rem nghal a, player ṭha kianga khelh chu a hahdam.

"Player ṭha chuan midang tan hmun an siamsak thiam a, kawng engkimah min pui thiam ṭhin bawk," tiin Kane a dahsang hle a, tun kar tawpa Bundesliga season an ṭan hunah pawh Bayern goal nawrtu tur an ni ang.