Durand Cup semifinal-ah NE United vs Lajong

IndianOil Durand Cup vawi 134-naah team 24 an tel a, July 23, 2025 aṭang khan khel ṭanin quarterfinal khelh zawh a ni tawh. Champion lai NorthEast United chuan quarterfinal-ah Bodoland chu 4-0 in an sawp a, semifinal-ah Shillong Lajong an hmachhawn ang.

SAI Stadium, Kokrajhar-ah NE United leh Bodoland inkhel en turin mipui 14,970 an pungkhawm a, ISL club tan Lalrinzuala pawhin bul a ṭan. NE United tan Moroccan forward Alaaeddine Ajaraie-a'n goal hnih khungin Spanish midfielder Andres Jose Rodriguez leh subsitute Parthib Gogoi ten an khung.

NE United-ah hian Serchhip tlangval Rinzuala bakah Champhai Zotlang tlangval Lalbiakdika te an tel a, Mizo player pahnih hi quarterfinal-ah an inlan ve ve. Inelna hi Imphal, Kokrajhar, Kolkata, Shillong leh Jamshedpur-ah te khelh a ni a, Lajong-in an mualah Indian Navy chu 2-1 in an hneh ve bawk.

Indian Navy-in Vijay Marandi hmangin minute 39-naah hma hruai hmasa mah se Lajong hian Damaiphang Lyngdoh leh Everbrightson Sana te hmangin an lehthal. Shillong club-ah hian Mizo tlangval Lalremtluanga a tel a, Indian Navy an hneh ṭumah a inlan lo.

Nizan khan Jamshedpur vs Diamond Harbour bakah East Bengal vs Mohun Bagan te an inkhel a, result kan hre hman lo. Semifinal hi August 19, Thawhlehni khelh a ni dawn a, Jawaharlal Nehru Stadium, Shillong-ah Lajong leh NE United te an inkhel ang.