Alcaraz lakah Zverev chak lo
Khaw lum leh boruak hnawng tak karah Carlos Alcaraz chuan Alexander Zverev hnehin Cincinnati Open final a lut, nomawi a inchuh pui tur hi Jannik Sinner a nih dawn avangin a hmuhnawm khawp ang.
Nimin zing khan Center Court-ah semifinal khelh niin, seeded pahnihna Alcaraz hian 6-4, 6-3 in hnehna a chang. Set khatna bikah a khingpui service vawi khat chhuhsakin, a service hloh thei dinhmunah vawi thum a din tawhna chu a inchhanhim.
Set hnihnaah Zverev a talbuai a, khaw lum vangin a khelh dan phung a hloh a, enkawl lailawk te a ngai hial. Match khel tluan thei mah se atan Alcaraz a ṭha hret a, inelna a mangṭha a ngaih phah ta a ni.
Spanish star Alcaraz chuan, "Zverev hi chu player ṭha leh ropui tak a ni a, ṭhian ṭha tak ni mah ila khelmual chhungah chuan chungnung zawk nih tumin theihtawp kan chhuah ṭhin, nawmsam lohna nei chunga a inkhelh avangin ka tan hmachhawn a nuam lo zual," a ti.
Nomawi inchuhna inkhelah Sinner a hmachhawn dawn tih a chiang a, final thlirlawkin Alcaraz chuan, "Kan theihna zawng zawng kan hlan leh ang, kan pahnih hian player ṭha lehzual zawkah kan inchher chhuak.
"Kan intawn hnuhnung bera ka tih dik tawk lohna ka ngaihtuahlet a, siamṭhat theih ngei ka tum dawn a ni. Taksa leh rilru a inpeih tawh hle a, final hmuhnawm leh en nuam tak a ni ngei ang," tiin a sawi.
Alcaraz leh Sinner te hi tun season chhung ringawt pawhin final-ah vawi thum an inhmachhawn tawh. Rome Open leh French Open final-ah Alcaraz a chak, an intawn hnuhnung Wimbledon hmawrbawknaah erawh Sinner a chak thung.
Semifinal inkhel dangah Sinner hian Terence Atmane chu 7-6 (7-4), 6-2 in a hneh a, kum 24 a tlin cham lawmna a ni nghal ang. Cincinnati Open-ah hian champion lai a ni a, nomawi humhim ngei a tum dawn a ni.
Italian tlangval Sinner chuan, "Kan inkhelh zawh hnuah khan piancham lawm nan thilpek min hlan a, ka beisei loh leh rin phak loh lam aṭangin a noi a, a hlu zual bik hle, ka hrereng tawh dawn a ni," a ti.
Sinner tan hard court hi inkhelh nawmna hmun a ni a, hard court bikah match 200 a chak tling ta chiah a, tun hnaiah match 26 chhung a zawnin a chak ta bawk, hremna a hman zawh hnuah a khel ṭha tluang leh tawh hle.