Cindy-i'n PUC a champion pui

I Day Hmeichhe Football inelnaah Pachhunga University College-in nomawi chawi turin final-ah Govt Hrangbana College 1-0 in an hneh a, goal awmchhun hi Cindy Remruatpuii Colney khung a ni. PUC hi MPL-a player langsar ni ṭhin Lalrinchhana (RCh-a) leh hmeichhe football-a tawnhriat nei ṭha Grace Lalrampari ten an enkawl a, final-ah team ṭha zawka ngaih HBC an hneh.

Zirtawpni zan khan final hi RG Stadium-ah khelh a ni a, PUC-in ṭantu an nei ṭha a, hei hian player a fuih ṭha bawk. Chutihrualin danglamna thlentu chu Armed Veng nula Cindy a ni a, ani hian minute 69-naah Sandra hnen aṭanga ball hmuh chu goal-ah a chanter a, goal class sang tak a ni.

Mizoram Police coach Lalbiaksanga Colney fanu Cindy hian India tana Under 20 AFC Women's Asian Cup qualifier a khelh avangin final-ah chauh a inlan. Cindy telna India team hian August 10, Pathianni khan Thuwunna Stadium, Yangon-ah Myanmar 1-0 a hnehin kum 20 hnuah AFC U20 Women's Asian Cup khel turin an tling.