Spurs an nung ṭha

Europa League champion Tottenham Hotspur-in Premier League team ṭha zingah an tel leh dawn tih lantirin Inrinni zan khan Burnley 3-0 in an sawp. Tottenham Hotspur Stadium-a inkhelah Spurs tan Richarlison-a'n goal hnih khungin Brennan Johnson-a'n goal khat a khung ve bawk.

Spurs hian season liam ta khan Europa League nomawi chawi mah se Premier League-ah 17-na an ni a, Ange Postecoglou pawhin a hna a chan phah. London club hian manager atan Thomas Frank chu Brentford aṭangin an lalut a, manager thar hnuaiah hmasawnna hmuh tur a awm.

Premier League ṭan hmain UEFA Super Cup-ah PSG an hmachhawn a, penalty shootout-ah chak lo mah se Thomas Frank-a hote hian Luis Enrique kaihhruai European champion hi an elpha. Clarets lakah Spurs an chungnung a, ṭan phat aṭangin chance ṭha an ngah nghal.

Player thar Mohammed Kudus a nung ṭha a, dinglam aṭanga a cross chu minute 10-na lekah Richarlison-a'n box chhung aṭangin a volley lut. Brazilian striker hi second half-ah pawh Burnley tlarhnung tan a hnawksak a, Kudus-a cross chu Richarlison hian a 'bicycle kick' goal. Minute 60-naa Richarlison-a goal hi goal ropui a ni.

Spurs an phur chhunzawm a, minute 66-naah Richarlison leh Pape Matar Sarr te thawhrah sengin Brennan Johnson-a'n a khung a, 3-0 in London club an chak. Thomas Frank-a hote hian nipui bazarah Mohammed Kudus, Mathys Tel leh Kevin Danso te an lalut tawh a, Palace midfielder Eberechi Eze lak tumin an hel leh mek. Season bul an ṭan ṭha a, Spurs hian an player duh ang lakluh theih bawk chuan a sang palia tel thei tur zinga mi an ni ang.