City tan Reijnders leh Haaland an vul

Manchester City-in season liam ta khan nomawi an chawi lo a, tun season-ah erawh Pep Guardiola hoten nomawi chawi ngei an tum. Inrinni zan khan City hian Molineux Stadium-ah Wolves an tlawh a, 4-0 in an sawp.

Player pawimawh Rodri la inhliam mah se Erling Haaland-a'n goal khung hna a ṭan a nghal a, Norwegian striker hian goal hnih khungin player thar Tijjani Reijnders leh Rayan Cherki ten goal khat ve ve an khung.

Pep-a naute hian ṭan phat aṭangin an nawr bet nghal a, inkhel an thunun bakah goal khungna chance pawh an insiam hnem. Chutihrualin Wolves pawhin an nawr ngam ve tho a, goal khung hmasa zawkah inngai mah se offside vangin an goal khung pawm an ni lo.

Minute 34-naah City-in mawi zetin Wolves tlarhnung an ṭhiat a, Rico Lewis-a cross chu Haaland-a'n awlsam takin a khung. AC Milan aṭanga an lakluh Tijjani Reijnders pawhin midfield-a ball semtu chauh ni loin goal a khung tel thei tih a pholang a, minute 37-naah Oscar Bobb-a pass chu goal kilah tak a pet lut.

First half-ah 2-0 a ni a, second half-ah City-in goal hnih tho an khung. Minute 61-naah dinglam aṭangin City-in an nawr phei a, Reijnders-a'n fing taka Haaland pe letin Norwegian striker hian chiang zetin a khung.

Pep-a'n goal veng turin James Trafford a hmang a, Burnley aṭanga an lakluh City academy chhuak hi a rintlak viau. Substitute aṭanga rawn lut Rayan Cherki pawhin box pawn aṭangin minute 81-naah a khung a, Man City-in inkhel thunun chungin 4-0 in hnehna an chang.

Pep Guardiola hote hian August 23, Inrinni zanah Burnley sawptu Tottenham an mikhual lehnghal dawn a, City leh Spurs tan fiahna a ni ve ve ang.