Kan vengah harhna a thlen ka beisei - CFC president

I League club Chanmari FC-in kum kaw chhung nomawi an hawi loh hnuah I Day Football-ah an champion a, Inrinni zan khan Chanmari YMA Hall-ah champion lawmna leh jersey thar tlangzarhna ngei nghalin nomawiin boruak ṭha a thlen ngei a rinawm. Chanmari club jersey hi Chanmari Presbyterian Kohhran bialtu pastor Rev Dr H. Vanlalruata'n a tlangzarh ni.

Chanmari FC president Vanlalruatfamkima (Valpuia) chuan, "Hun rei tak kan champion loh hnua nomawi kan chawi leh hi kan lawm hle a ni. Nomawi kan chawi lohna a rei tawh avangin kan vengah football a nung tawk lo a, entu pawh kan ngah tawk lo. Tunah erawh nomawi kan chawi ta a, hei hian harh tharna a thlen ngei ka beisei," tiin Vanglaini a hrilh.

I Day Football-ah Chanmari hian an khingpui zawng zawng hun pangngaiah an hneh vek a, an khelh dan thlirin champion phu ber an ni. Rochhingpuia hote hian match rukah goal 19 khungin goal nga an chhuah a, MPL12-ah pawh champion rinkai an ni ang.