CYMA Futsal hmasa ber champion Dinthar

LBS Suzuki 1st Inter Branch YMA Futsal Tournament final hmuhnawm takah Dintharin Zonuam 5-2 a lehthalin an champion. Dinthar hian Lalmalsawma Memorial Futsal MFA Inter Village Futsal Tournament 2020 final-ah Zonuam hi an hneh tawh a, tun ṭumah pawh hneh lehin CYMA Futsal hmasa ber an champion-na kawngah best player-a thlan Michael K. Lalhriatpuia a thawh hlawk hle.

Nomawi zawnna hi R. Dengṭhuama Hall, Mualpuiah Inrinni khan neih a ni a, entu an ṭhahnem a, inkhel pawh a nung ṭha. Inelna buatsaihtu MFA leh Central YMA an fakawm a, kuminah hlawhtling taka football inelna an buatsaih hnuin thla thum pawh tling loah hlawhtling takin futsal inelna an buatsaih lehnghal a ni.

Final hmuhnawm

Zonuamin hi MFA Inter Village Futsal champion lai an ni a, double champion nih ngei an tum. Final boruak sangah Peter Lalzuiliana'n a theihna rawn lantir nghalin minute khatna lekah Zonuam tan goal a khung nghal.

Team panih an inhnehtawk a, Zonuam tlarhnung a phui ṭha. Mahse, Zonuamin a hun loah substitution siamin C. Lalnunthara'n hun thawl a neih phah a, corner kick hmangin ṭangkaiin box pawn aṭangin siphurh a sut. Zonuam tan captain Lalṭhazuala (Puitea) a rawn inlar a, minute 20-naah Puitea hian keeper bumin goal a khung a, first half-ah 2-1 a ni.

Second half-ah inkhel a nung chhunzawm a, minute 30-naah Zonuam tlarhnung inringtawk lo lai chu Lallawmawma'n hmu fuhin chak takin a lalut thut a, siphurh sutna goal a khung.

Minute hnih chauh a awm tawh tihin 2-2 a la ni a, inkhel a la nung ṭha hle. Zonuamin foul vawi ngana an neih avangin second penalty an chawi a, meter 10 aṭanga hla emaw foul an hmuhna aṭangin penalty an pet thei. Dinthar star thar Michael-a rawn pen chhuakin goal-ah a chantir.

Dinthar dinhmun a ṭha ta zawk a, Zonuam lamin foul nei lehin second penalty an chawi leh. Michael-a bawkin rawn petin goal-ah a chantir leh a, Dinthar rawlthar duhawm hian chance ṭha nei lehin keeper a bum hnuah goal a khung a, minute hnih chhung lekin hattrick a siam a, Dinthar a champion pui.

Branch hruaitute phurpui

Dintharin champion phu khawpin an thawkrim a, ṭawiawmtu an nei ṭha a, chutihrualin nomawi an chawi theih nan branch hruaituten an tuipui. Dinthar coach K. Lalrintluanga (Mapuia) chuan, "Kan inbuatsaih ṭan aṭangin Branch YMA leh Sport Sub-Committee lama kan hruaituten theihtawp min chhuahpui a, chu chuan kan player naupang deuh zawkte rilruah chak duhna thinlung nasa takin a pe. Pathian awmpuina kan chang a, an nauten a tawp thlengin chak duhin theihtawp an chhuah. Pathianin mal min sawm a ni ber e," tiin Vanglaini a hrilh.

Mapuia chuan sawi chhunzawmin, "Kan tournament khelh chhungin vengchhung mi ṭhenkhatten player leh coaching staff-te duhsakna thilpek min pe nasa hle. Kan match hmasa ber aṭangin ṭawiawmtu ṭhahnem tak kan nei chho reng a, veng mipuite min ṭawiawmna leh ṭanrualna rah kan seng ve bawk a ni," tiin khawtlang anga an ṭanrual thu a sawi bawk.