Brentford an che na

Premier League club Brentford chuan an club player man to ber ni turin, Bournemouth forward Dango Ouattara an la lut dawn a, Cherries nena an inremna zat hi pound maktaduai 42.5 zet a ni.

Kum 23 mi forward hian nimin khan London panin, Brentford-ah hian medical a nei nghal a, he thuziak i chhiar meuh chuan an player a ni fel tawh hial ang.

Burkina Faso international Ouattara hian an ram club Majestic FC aṭangin a professional zinkawng a zawh ṭan a, Ligue 1 club Lorient B team leh senior team tana a khelh hnuin, kum 2023 khan Bournemouth hi a zawm.

Season hman zawh takah khan inelna hrang hrangah match 37 khelin goal kua a khung a, assist vawi li a nei - a hma season khat leh a chanve a khelh chhungin match 51-ah goal hnih a khung a, hma a sawn hle.

Mahse, Ouattara hian Bournemouth-ah hmun pawimawh chang tawk loah inngaiin, chhuahsan a duh a, Brentford lawmah a tla ta a ni.

Europa League khel tur Nottingham Forest pawhin Ouattara hi an thlithlai hman a, mahse, English winger Omari Hutchinson chu Ipswich Town aṭangin £37.5mtd-in an la ta zawk.

Hutchinson hi Brentford pawhin lakluh tumin an lo dawr tawh a, mahse, £35mtd-a an dawrna hnar a nih hnuah a aia to zawkin Ouattara lakluh an thlang ta a ni.

Brentford hian Ouattara lakluh avangin striker Yoane Wissa an chhuahtir ang em, tih erawh a la chiang chuang lo.

Wissa hi Newcastle United chuan an duh a, mahse, £25mtd bakah a khelh ṭhat dan a zira £5mtd pek belh an inhuamna chu Brentford hian an hnar.

Brentford hian Pathianni zan dar 6:30-ah league match khel turin Nottingham Forest an lenchilh dawn a, coach Keith Andrews chuan hma hun chiang lo striker hi a inlan rih loh tur thu a sawi.