Grealish-a'n Everton a zawm

Jack Grealish chuan Manchester City aṭangin Everton a zawm, an inremna hi season khat chhung loan atan tih a ni, inkhelh tam duh avangin a khelh theihna tur hmun nia a hriat a pan.

Football nipui bazarah Everton hian player paruk an la tawh - Grealish hma hian Kiernan Dewsbury-Hall, Charly Alcaraz, Thierno Barry, Mark Travers leh Adam Aznou te a lo lalut tawh bawk.

Toffees manager David Moyes-a'n player lak an harsat thu leh, an hun ṭha neih an bawhpelh thu a lo sawi tawh a, tun hnaiah erawh player an lalut tam ta malh malh hle.

England international forward Grealish chuan, "Everton hi club ropui tak, fans nei ṭha em em an ni a, ka zawm thei hi ka lawm. Manager nen kan inbia a, social media kaltlangin fans lamin boruak nuam tak an lo siam bawk," tiin a sawi.

Grealish hian kum 2021 khan Aston Villa aṭangin Man City a zawm, pound maktaduai 100 man niin British player man tam ber a ni hial. City tan match 150 chuang khelin Premier League nomawi pathum bakah Champions League leh FA Cup te a lakpui tawh bawk.

Mahse, coach Pep Guatdiola-a'n tun hnaiah a chhawr ngai lo, season hmasa khan EPL match pasarihah chiah inkhel bul a ṭan a, tun season khuh hawn nana Club World Cup an khelh ṭum phei kha chuan an hruai ve lo.

Kum 29 mi Grealish hian indinthar leh a tum a, khelmual chhunga hun hman tam a mamawh. Premier League season bul ṭan nana Leeds United nen an inkhelh hunah pawh a hmel lan hman a beisei ang.