Aizawl FC khingpui tur Police

I Day Football-ah I League club Aizawl FC leh MPL club thar Saikhamakawn te goal awm loin an inhnehtawk. Nimin inkhelah chak zawk awm lo mah se Lalsangzuala Hmar kaihhruai Saikhamakawnin MLS FC an sawp zawk avangin goal difference hmangin group B hmahruaitu an ni.

Aizawl FC-in knockout stage lut mah se pahnihna an nih avangin quarterfinal-ah nikum final-a an hneh loh Mizoram Police an hmachhawn dawn. I League club hi hming en chuan langsar mah se season dang ang a ni lo a, an squad a chhah tawk lo a, group hmahruaitu an ni lo pawh hi thilmak a ni hran lo.

Chutiang bawkin Police hian season dang an pha lo a, MPL kai thar Kanan an ngam loh vangin an group-ah pahnihna an ni a; Aizawl FC emaw Police emawin semifinal an thleng zo dawn lo. Semifinal-ah hian nikum final rematch-a chak zawk hian I League club Chanmari FC leh Ramhlun North inkhel chak zawk an hmachhawn dawn a, final-ah I League club pahnih an inhmachhawn dawn lo tih chu a chiang nghal der tawh.