Aizawl FC dinhmun hriatna tur Saikhamakawn
I Day Football ṭan hmain Aizawl FC hi I Day Football champion tura rinkai zinga mi an ni a, inelna ṭan hnuah erawh I League club hi Saikhamakawn en intum tawk tura ngaih an ni tawh. Vawiin chawhma dar 10:00 hian Aizawl FC leh Saikhamakawn FC te an inkhel ang a, group hmahruaitu tur an zawng ang.
Group B aṭangin MLS FC an tla tawh a, Aizawl FC leh Saikhamakawn FC ten knockout stage lut tawh ve ve mah se group hmahruaitu nih an duh dawn. I League club hi coach R. Lalruatfela'n a ho a, match hmasa berah MLS FC 1-0 in an hneh. Aizawl FC khel nghet ṭha viau mah se Lawngtlai club hi Saikhamakawnin 6-0 zeta an sawp avangin MPL club thar hian I League club hi an elpha tura ngaih a ni.
Saikhamakawn hi MPL club thar ni mah se team enkawltu erawh MPL-a tawnhriat nei ṭha an ni a, MPL-a champion ngun ber coach Lalsangzuala Hmar an kawl bakah Chanmari FC-a manager hna hun rei tak chelh tawhtu C. Lalthanmawia (Mawitea) chu manager atan an lalut.
Tualchhung football hriain an enkawl miau vangin player pawh an nei ṭha a, MLS laka goal hnih ve ve khungtu Suanngaihmuana leh Lalnunzira Sailo te phei chu tun dinhmuna attacking player ṭha ber zinga mi an ni hrim hrim.
Goalkeeper-ah RS Lallawmzuala an nei hei a, position tinah Mizoram senior team aiawh kal tawh an neih vek avangin Saikhamakawn hi dah hniam chi an ni lo. Chutihrualin Aizawl FC erawh team nghet sa an ni a, player ṭhahnem takin chhuahsan mah se defender Rohmingthanga, midfielder Eric Remruatpuia Chhangte leh winger Vincent Lalduhawma te an lalut a. AFC hian an player neih sa goalkeeper Vanlalhriatpuia, winger Sawma Tlangte leh Laltlanzova (Zozoa) bakah striker Lalhriatpuia te an chelh a, senior team-a an sawn chhoh academy player-te an rintlak viau bawk.
Vawiin hi Aizawl FC dinhmun hriatna tur a ni dawn a, coach R. Lalruatfela theihna lan hun a ni thei ang. Saikhamakawn tan erawh I League club hneh theih hi an veng chanchina hun pawimawh a nih phak dawn avangin chawhma dar 10:00 pawh ni se, ṭantu an neih ṭhat a pawimawh dawn.