Harsa takin Gauff a chak

Canadian Open khelh laiah seeded pakhatna Coco Gauff chuan fiahna hautak a paltlang, set hmasa a hloh hmasak zet hnuah Veronika Kudermetova chu 4-6, 7-5, 6-2 a hnehin last 16 a invaw kai.

Nimin zing Centre Court-a inkhelah, American nula Gauff hian tihsual a ngah lehpek hle - double fault ringawt pawh vawi 14 a nei tling a, ama tihsual vanga a khingpuiin point a hmuh a tam ṭhin hle, tun inelna a hmang ṭha tawk rih lo.

French Open champion lai Gauff chuan, "Inkhel hautak tak a ni. Ka rilru put hmang a dik a, a bik takin ka khingpui ball vuak ka lo dawnsawn dan leh vuak let danah khan ka lawm, chutihrualin siamṭhat ngai lai erawh ka ngah," a ti.

Kum 21 mi Gauff hian a match lehpekah chuan Victoria Mboko a hmachhawn leh ang. Canadian player Mboko hian inkhel dangah Czech Republic mi Marie Bouzkova chu 1-6, 6-3, 6-0 in a lo paltlang ve thung a ni, world number 2 Gauff tan fimkhur a ngai ang.

Inkhel dangah seeded palina Mirra Andreeva chuan McCartney Kessler chu 7-6, 6-5 in a hneh a, Marta Kostyuk pawhin seeded 15-na Daria Kasatkina chu 3-6, 6-3, 7-6 (4) a hnehin last 16 a inhlangkai ve bawk. Chinese nula Zhu Lin pawhin Suzan Lamens chu 6-2, 6-2 in a hneh.