Nakkumah Red Bull car ka la khalh ang - Verstappen

Red Bull leh Max Verstappen inkar thawm hrang hrang a awm a, an hma hun tur inrinsiak thawm pawh a lian; boruak hrang hrang karah Verstappen chuan season thar lo awm turah pawh a team chhuahsan tumna a nei lo tih a sawi chiang.

World champion vawi li ni tawh Verstappen hian Red Bull-ah hian kum 2028 thleng daih contract a nei mek, mahse season hmasa aṭang khan chhunglamah sawi neuh neuh a awm fo a, team thuneitu lam leh an chhungkaw thu inhmuh loh chang a awm bawk.

Mercedes chuan Verstappen hi lak an duh niin khawthlang chanchinbute chuan an tarlang a, Dutch driver pawhin zawm a hreh lo nia sawi a awm. Mahse, season tharah chuan an la thawk ho rih mai dawn lo niin a lang.

Red Bull driver Verstappen chuan, "Ka hma hun chungchang hi ka duhthlanna vangin ka sawi chhuak hmasa ngai lo a, sawi chhuah a ṭul pawh ka ti lem lo. Mahse, chanchinbu mite ka hmachhawn hian zawhna ka chhan a ṭul si ṭhin.

"Tunah pawh zawhna ka dawng leh a, ka chhan theih chu season tharah hian Red Bull hian engtin nge nasa lehzual zawka hma kan sawn theih ang tih hi a ni zawk a, kum tharah pawh Red Bull car bawk ka khalh leh ang," tiin a sawi a, hun lo kal zel tur erawh a sawi lawk thei bik lo.

Dutch tlangval hian tun hnai season li chhung chu Formula 1 nomawi a chawi a, midang chunga leng a ni. Tun season kal laiah erawh McLaren driver pahnih - Oscar Piastri leh Lando Norris te hnungah a awm mek, a tan nomawi humhim a harsa dawn niin a lang.

Verstappen chuan sawi zawmin, "Hma hun chungchangah hian a chhanna ngai bak pek tur ka nei ngai lo, chuvangin kei leh team chungchang min zawhna hi chu tawp tawh rih se ka duh hle," tiin a sawi a, tun kar tawpa intlansiak an neih tur atan rilru a pek nat thu a sawi bawk.

Red Bull driver thusawi aṭang chuan Mercedes lam a pan dawn rih lo a, Mercedes chuan an driver pahnih George Russell leh Kimi Antonelli te chu an la hmang chhunzawm dawn tihna a ni a, season hmasa zawh rual khan Lewis Hamilton a lo chhuak tawh a ni.

Pathianni zan dar 6:30 hian Hungaroring tlankawngah Hungarian Grand Prix an tlan dawn, season kal laia a vawi thum nan Verstappen chuan hnehna chan a tum dawn, a tan thil awlsam erawh a ni dawn lo - McLaren team el phak an tum dawn a ni.

Driver championship-a pahnihna ni lai Lando Norris chuan, "Qualifying tlan ṭhat a pawimawh a, a bul ṭanna a ni. Mahse, a nihna takah chuan intlansiak takah tu nge tihsual nei tlem a, nghelnghet leh ṭha taka tlan rei thei ber tih chu a pawimawh zawk.

"Mi tam takin Oscar Piastri nena kan inthlauhna chauh an sawi a, kan bul hnai maiah hian vawi li champion tawh Max a awm a ni tih kan hriat a ngai, tihsual kan neih hlek chuan ani hian na takin min hrem let nghal mai dawn a ni," tiin a sawi.

Car intlansiakna sang ber hi tun season chhungin vawi 24 neih tur a ni a, chung zinga 13 chu an tlan tawh. Tlan hmabak 11 an la nei a, champion tuma inum boruak pawh nasa takin a la danglam thei dawn a, fimkhur a la ngai dawn hle.