Isak-a'n training a nei hrang

Newcastle United forward Alexander Isak chu England lamah pawh a la kir rih lo - a club hlui Real Sociedad lamah training a nei mek a, a hma hun a chian loh chhunzawm zel.

Swedish striker hi Asia-a pre-season tour nei Magpies squad-ah pawh a tel lo a, English club hian an player hi hliam tenau neih avanga hruai lo an nih thu an sawi.

Mahse, a hnu lawkah Isak hian club dang zawm a duh thu Magpies hi a hrilh a, Liverpool chuan pound maktaduai 120-in lak an huam nia sawi a ni.

Kum 2022-a Real Sociedad aṭanga £60mtd-a Magpies pantu hian Sociedad training ground hi a hmang hawh ringawt a, team zingah pawh training nei loin, a hranpain training a nei.

Isak hian Magpies tan inelna hrang hrangah match 109 khel tawhin, goal 62 leh assist 11 a nei a, season hman zawh takah khan match 42 khelin, goal 27 a khung a, assist vawi ruk a nei - League Cup-ah a champion pui bawk.