Arsenal tan Viktor Gyokeres a inlan

Viktor Gyokeres chuan Arsenal tana a match hmasa ber a khel a, goal erawh a khung lo - bench aṭanga lutin danglamna a la siam thei lo a, an hmelma Tottenham Hotspur lakah 1-0 in an chak lo.

Ningani zan tir lam khan Kai Tak Sports Park, Hong Kong-ah North London Derby khelh a ni a, goal awmchhun hi Spurs midfielder Pape Matar Sarr khung niin, hla tak aṭangin Arsenal goalkeeper David Raya chu a pet khum a ni.

Gunners hi striker an mamawh thu sawi ṭhin an a ni a, an duh ang ngeiin Sporting Lisbon aṭangin Gyokeres an la lut; ni hnih vel chauh training la nei mah se Spurs lakah a hmel kan hmu nghal a, danglamna thlen tur chuan a tan a la hma hret.

Tottenham lakah Bukayo Saka chuan mual sir aṭangin nawr tum viau mah se an veng phui tlat a, mual sir lehlam aṭanga ball tlan pui emaw lo pawt kak thei tur emaw an nei ṭha tawk lo - Leandro Trossard leh Gabriel Martinelli te an hriam tawk lo a ni.

Kai Havertz hi forward ṭha pangngai tak ni mah se striker a nih miau loh avangin goal khung reng tura beisei chi a ni lo a, number 9 player an lei chhan pawh a ni. Coach Mikel Arteta-a'n season tharah chuan Gyokeres an chawm theih dan tur a ngaihtuah chhuah a ngai ang.

Gunners manager Arteta chuan, "Asia khawmuala kan zin chhuahna aṭangin thil tam tak kan zir chhuak, kan duh ang thlap chu a ni vek lo mai thei. Mahse, kan hun tawnah khan lawmna tur tam tak a awm, ni 12 chhung vela kan thil zir chhuah ho kha a hlu.

"Tunah chuan kan match hmabak atan rilru kan pe chhunzawm ang a, season thar hmain a tam thei ang ber zirchhuah belh kan tum ang," tiin a sawi. Premier League ṭan hmain match khelh tur pahnih an la nei.

August 6, Nilaini zanah Villarreal nen an inkhel ang a, chumi hnuah Athletic Club an mikhual leh bawk ang; match pahnih hi Emirates Stadium-ah ve ve khelh tur a ni tawh dawn a, tunah chuan London khawpui lamah inbuatsaihna an nei dawn tihna a ni.

Asia khawmuala an zinchhuahnaah hian Arsenal tan defender pawimawh Gabriel a inlan ve lo - Brazil international hi hliam tenau vangin a chawl nia sawi a ni a, defender Jurrien Timber leh Riccardo Calafiori te pawhin Spurs an hmachhawn ve lo.

Arteta chuan, "Gabriel, Calafoiri leh Timber te hian training ṭhenkhat chu an zawm tawh a, an ṭhiante anga training zawng zawng zawm erawh an la ni lo. Hun rei lote chhungin inkhel pangngai turin an inpeih ka beisei," a ti a, EPL ṭan hunah chhawr theih a inring.

North London club hian tlarhma sira khel thei player ṭha an la mamawh belh tih a chiang a, an ṭhat tawk lohna lai thuam chak turin Eze an beisei mek. Crystal Palace forward hi awlsam taka lak chhuah theih tur ni erawhin a lang lo.

Eze-a contract neih laiah hian pound maktaduai 68-a lei chhuah theih a ni a, he inremna hi nipui bazar hun tawp hma hretin a tawp dawn. Mahse, khawthlang chanchinbu rintlakte chuan, he inremna hi a zo a nih pawhin Eze hi man tam tham tak lo chuan hralh an phal dawn lo niin an sawi thung.

Arsenal hian Premier League bul ṭan nan Manchester United an tlawh dawn. Old Trafford aṭanga point thum hmuh nghal an duh a nih chuan, inbuatsaihna hun an la neih chhun an hman ṭangkai a ngai dawn hle a ni.