Tuithiang hmaah Dinthar fiahna

I Day Football-ah vawiin chhun dar 12:00 hian Dinthar FC leh Tuithiang FC te an inkhel dawn a, MPL club hian point an la hmuh loh avangin point thum hmu tawh First Division club nena an inkhel tur hi a hmuhnawm ang. I League club Chanmari FC-in tlai dar 3:00-ah FIFA AIFF Talent Academy an hmachhawn bawk ang.

Tuithiang hian match hmasa berah FIFA AIFF Talent Academy 3-0 a an sawp avangin knockout stage lut tura ngaih an ni nghal a, mah se an team theihna tak erawh Dinthar hmaah a hriat chauh ang. First Division club training leh kalphung zawng zawng hi Mizo coach ṭha Lalsangzuala Hmarin a enpui vek a, hei vang hian an tawh a khirh viau dawn.

Tuithiang hian player an nei chhe lo a, FIFA AIFF Talent Academy lakah Lalrinpuia'n goal hnih khungin Lalbiakhlua'n goal khat a khung bawk. Player pahnih hi MPL-a tawnhriat nei tawh an ni a, Dinthar FC an hlau bik lo ang.

An khingpui tur Dinthar hian Chanmari FC hneh loin bul a ṭan a, Tuithiang lakah Chanmari an hmachhawn ṭuma hnawhchhuah R. Laldanmawia a khel thei dawn lo bawk. Heti chung hian Dinthar hi Tuithiang lakah a buk rit zawk an ni dawn a, MS Dawngliana (Dawngtea) pawhin goal hmangin Maimawms lawmna siam a tum ang.

Chutihrualin Laldampuia hote hi an chak lo a nih chuan chesual ve thei an ni a, Tuithiang lakah point thum an hmu thei lo a nih pawhin point khat erawh an hmuh ngei ngei a ṭul dawn.

Group C inkhel dangah FIFA AIFF Talent Academy leh Chanmari FC te an inkhel dawn a, an kum a inthlauh deuh vangin I League club tan harsatna tur awmin a lang lo. Rochhingpuia leh a hote hian kum 14-15 rual bulah thapui an chhuah duh ang em, tih hi zawhna awm chu a ni a, AIFF Academy pawhin an nihna tak an hria a nih chuan goal venhim an ngai pawimawh ang.