Ram tiam lam panin Kanan an kal zel

Chawngthansanga kaihhruai Kanan FC-in nimin khan SYS FC 4-0 in an sawp a, MPL kai thar hian match hmasa pahnihah hnehna changin I Day Football quarterfinal an lut. Kanan hian August 4, Thawhṭanni hian group match hnuhnung berah Mizoram Police nen group hmahruaitu an zawng dawn a, Lalbiaksanga Colney hote pawhin semifinal an lut tawh.

Lunglei club SYS FC-in match hmasa pahnihah hnehna chang lo ve ve mah se quarterfinal luh beiseina an la nei a, group match hnuhnung bera Ramhlun North an hneh chuan knockout stage an lut dawn. Group A-ah team pali an awm a, team pathumin quarterfinal an lut ang.

Kanan an vul

Kanan FC-in kum 10 chuang Mizoram Premier League khelh tuma an beih hnuah Mizoram football inelna sang ber khel turin an inpetkai a, MPL club an nih tak avangin MFA buatsaih I Day Football an khel thei ta chiah. Chawnga hote hi inelna ṭan hmain knockout stage lut tura rinkai chu ni mah se tun anga inkhel thunun tura beisei an ni lo.

MPL club thar hian harsatna an nei lo a, Ramhlun North an hneh hnuah SYS 4-0 in an sawp a, tunah chuan champion beiseiawm zinga mi an ni thei ang. Nimin RG Stadium-a inkhelah Kanan hian inkhel an thunun zawk hrim hrim a; Lalthanpuia (Tepuia), Lalthlanawma leh F. Lallawmkima ten goal an khung bakah SYS defender T. Vanlalruata'n an lamah a tilut bawk.

Result ṭha duhtu

SYS FC-in season liam ta khan MPL an khel tawh a, anni tan erawh season khatna aiin season hnihna a harsa zawk dawn. Season khatnaah Lalmuankima hote hi an khelh ṭhat avangin SYS hian an player ṭhate an chân nual a, team thar an din a ṭul. Kanan erawh MPL club thar ni mah se result ṭha duhin player ṭha an la lut.

Kananin ṭan phat aṭangin an ngam zawk a, an pressure pek nat rah zarah hmun hlauhawm laiah ball chhuhsakin Lawma ball pek chu box pawnah Tepuia'n a chang a, kawh zetin goal kilah a pet lut. Minute linaa goal hi goal mawi bik a ni.

Kanan an hlauhawm chhunzawm a, chutihrualin SYS player Oliver Lalmalsawma Khiangte pawhin goal ban a tihper. Minute 21-naah Kananin goal hnihna an khung a, Aizawl FC leh Chanmari FC midfielder hlui Hmangaihkima corner pet chu SYS player Ruata'n an lamah a tilut.

Second half-ah pawh Kananin player an neih ṭhat rah an seng a, bench aṭanga lut Thlanawma'n box pawna aṭangin goal kilah a pet lut. Minute 85-naah Ramhlun North an hneh ṭuma player of the match Lalthuthlunga'n vei lam aṭangin ṭha zetin a la lut a, a cross ṭha chu Lawma'n a khung. Khawbung tlangval Lawma'n Kanan FC tana a goal hmasa ber a khung a, goal tam zawk a la khung tura ngaih a ni.

Kanan hian tlarhmaah player an nei ṭha a; season liam taa MPL-a player ṭha zinga tel phak Lawma, Tepuia leh Lalthanzuala (TZ-a) te an kawl a, season hnih chu ADFA First Division-a top scorer ni thei Thlunga an chelh bawk. Chawnga hote hi Police an hmachhawn hunah pawh a buk rit zawk an ni hial ang.