Tuithiangin AIFF Academy an hneh

I Day Football-ah state pawn aṭanga rawn tel awmchhun FIFA AIFF Talent Academy chu nimin khan a vawi khat nan an rawn inlan a, Aizawl DFA first Division club Tuithiang lakah 3-0 in an chak lo. Group C-ah hian Chanmari FC, Dinthar FC, Tuithiang FC leh FIFA AIFF Talent Academy te an awm a, team pathumin quarterfinal lut dawn mah se India rawlthar ṭha rual tan hmabak a hautak ta hle.

RG Stadium-a inkhelah Tuithiangin ṭan phat aṭangin an nawr na nghal a, kum lama naupang AIFF Academy-in harsatna an tawk nghal. Chutihrualin state pawn player hian an zir angin tlarhnung aṭangin pass chhuah an tum a, tharumah an hneh tlat loh avangin an tihsual a pawi lehzual.

Minute thumna lekah Mama pass let chu defender Ali-a'n dang fuh loin Lalrinpuia a rawn inrawlh hman a, Tuithiang striker hian hnai tak aṭangin a khung. First half-ah Tuithiangin goal khung belh lo mah se inkhel an thunun a, goal chance pawh an insiam nual.

Second half-ah AIFF Academy inkhel rawn kang hret mah se Tuithiang an la ṭha zawk tho. Substitute Lalbiakhlua'n minute 65-naah hla tak aṭangin Tuithiang goal hnihna a pet lut a, goalkeeper Leitanthem Niky Meitei naupanna a lang. Goal hmahruai khungtu Rinpuia'n minute 84-naah AIFF Academy offside trap bumin chak takin a la lut a, Tuithiang chak nemnghehna goal a khung.

Rinpuia hian hun tawp hma hretin hattrick siamna hun ṭha a nei a, ṭha taka a insiamrem vek hnuah goal zawnah a pet lo. AIFF Academy lamin goal chance an nei ve meuh lo a, chutihrualin player-te hi kum 2010 leh 2011-a piangte an ni hlawm a, kum 14 leh 15 vel chauh an ni tih hriat a ṭha.

AIFF Academy-ah Mizo panga an awm a, nimin inkhelah hian bul an ṭan vek. Captain Malsawmtluanga (Mala), right back R.Vanlalṭanpuia (Puia), midfielder Lalrinsanga (Toto-a) leh R. Lawmsangzuala (Mama) bakah winger R. Lalremruatfela (Fela) te tan I Day Football hi inzirna ṭha tak a ni ngei ang.