Quarterfinal lut tur zawnna: Tlai dar 3-ah Saikhamakawn Vs MLS FC

I Day Football 2025-ah vawiin tlai dar 3:00 hian Mizoram Premier League club thar pahnih Saikhamakawn leh MLS FC te an inkhel dawn. Lawngtlai club hian an match hmasa berah Aizawl FC an hneh loh avangin coach Lalsangzuala Hmar enkawl Saikhamakawn an hneh lo a nih chuan an tla dawn.

R. Vanlalpeka enkawl MLS-in Aizawl FC lakah MPL khel tlak an nihzia an nemnghet a, I League club pawh an chai thei viau. Inkhelh banah Peka chuan, "Lawngtlai leh Lunglei vela kan khelh chhuah theih ang khan RG Stadium-ah kan la khel thei lo," tiin a sawi a, anmahni ang bawka MPL club thar lakah an theihna lantir an tum dawn.

MLS hian CYMA Football 2025-a Khawzawl Vengthar tana khel ṭha zet defender F. Lalchhanchhuaha an kawl a, I League club laka goal khat chauh an chhuah pawh thilmak a ni hran lo. Vawiin lamah erawh chak an mamawhna chen a awm avangin goal nawr kawngah hma an sawn a ṭul ang.

Saikhamakawn hi MPL club thar ni mah se an coach erawh MPL-a record nei ṭha ber Lalsangzuala Hmar a ni thung a, CYMA Football-ah Republic Veng a champion pui avangin amah mai bakah a nauten inrintawkna an ngah phah dawn.

Sanga hian CYMA Football best goalkeeper RS Lallawmzuala a la lut thei a, midfield-ah pawh Kiran Chhetri, J.H Remlala leh Malsawmdawngkima te a nei a, striker-ah Suanngaihmuana an kawl bawk. Amuana hi khup hliam vanga rei tak a inenkawl hnuah a dam leh tawh a, I Day Football-a player en châkawm zinga mi a ni.