Player langsar ho an chak

Tennis inelna Canadian Open khelh laiah Taylor Fritz, Ben Shelton leh Andrey Rublev ten hnehna an chang - Russian tlangval Rublev tan hnehna chan mai bakah mellung pawimawh phunna hun a ni nghal bawk.

Ruah surin inkhel a tihbuai karah Taylor Fritz chuan Roberto Carballes Baena chu 7-5, 7-6 (7/1) in a hneh a, ruah vanga chawlh lailawk neih chang awm mah se Fritz a ding nghet tlang thei a ni.

Season kal laia Stuttgart leh Eastbourne title la tawhtu Fritz chuan, "A chang chuan kan duh leh beisei ang veka thil a thlen loh chang a awm, chutiang karah pawh chuan danglam loa khelh theih a pawimawh, inbuatsaihna ka neih pawh hian hun harsa hmachhawn turin ka inzir tel ṭhin," a ti.

Inkhel dangah Ben Shelton chuan Adrian Mannarino 6-2, 6-3 in a hneh. Shelton chuan, "Ball vuak na leh dahna tur lai hrei thei em em mai a ni a, ka tan chuan ani hneh theih hi a hlu," tiin a sawi.

Nikuma pahnihna Andrey Rublev chuan Hugo Gaston 6-2, 6-3 in a hneh. Hard court inelna bikah Rublev hian match 250 hnehna a chang tling ta chiah a, a tan chuan mellung pawimawh bik a ni ngei ang.

Seeded parukna Rublev hian match point a hmuh palina chu a tlang pui a ni, a match lehpekah chuan Lorenzo Sonego a tum leh ang. Italian tlangval Sonego hian Bu Yunchaokete chu 6-1, 6-4 in a hneh ve bawk.