London leh Manchester-ah NBA khel dawn

United Kingdom chuan kum 2019 hnua a vawi khat nan NBA a thleng leh dawn, basketball inelna ngaihhlut hi khawpui lian pahnih London (2026) leh Manchester (2027) te chuan an thleng dawn tih nemngheh a ni.

London khawpuia awm O2 Arena-ah hian NBA regular match an khel ang; kum 2026 January 18, Pathianniah Orlando Magic leh Memphis Grizzlies te inkhel a thleng dawn a ni. Kum 2019 khan Washington Wizards leh New York Knicks te an lo inkhel tawh, a hnu lamah UK-in NBA match a thlen lehna hmasa tur a ni ang.

Manchester khawpui chuan kum 2027-ah regular season match an thleng dawn, basketball inelna lian an thlenna hmasa ber tur a ni thung ang; tun hmain season thar inbuatsaihna match - Oklahoma City Thunder leh Philadelphia 76ers te inkhel chu an lo thleng tawh bawk.

London mayor Sir Sadiq Khan chuan, "London hi khawvelah chuan infiamna khawpui lian a ni a, tunah pawh O2 Arena chuan NBA a thlen tur thu tihfel a ni leh ta," a ti. Greater Manchester mayor Andy Burnham pawhin NBA nen inremna an nei thei chu lawmawm a tih thu a sawi ve bawk a ni.

NBA hian kum 2026, 2027 leh 2028 hian Europe khawmualpuiah match hnih ṭheuh an khel dawn; London leh Manchester bakah hian Berlin leh Paris te pawhin basketball inelna hi a thleng dawn a ni.