Messi-a'n assist vawi hnih nei

Lionel Messi-a'n goal khung lo mah se Inter Miami chakna hnar a la ni zel - Argentina captain hian nimin zing khan a ṭhiante goal khung tur pahnih a siamsak a, a team Miami hi Atlas lakah 2-1 in hnehna a chanpui.

Leagues Cup inkhelah Messi hian Telasco Segovia tan minute 58-naah a siamsak a, mahse Atlas lamin Rivaldo Lozano hmangin an sut, hun tawp dawn thlengin team pahnihte hi 1-1 in an inhnehtawk.

Hamrik hnuhnung rik hma chiahin Messi a inlar, box chhungah remchang ṭha bik a sual chhuak a, goalkeeper chauh a hmachhawn tawh hnuah aman khung mai loin, Marcelo Weigandt tan a siamsak, hun tawp rualin chakna goal an khung.

All-Star Game an khelh loh avangin Messi leh Jordi Alba te hi Major League Soccer-ah match khat hrem an ni a, mahse Leagues Cup erawh an khel thei nghal thung a, an chak theih nan an ṭangkai leh nghal hle.

July chhungin Messi hian goal riat a khung bakah a ṭhiante goal khung tur vawi nga a siamsak tling hman - Major League Soccer Player of the Month atan thlan a ni, a kum tam deuh tawh mah se a thiam a la theihnghilh lo.

Argentine midfielder Rodrigo De Paul pawhin Inter Miami tana a match hmasa ber a khel. De Paul hian Atletico Madrid aṭangin Miami hi a zawm a, inelna hautak zawk La Liga aṭanga MLS a pan dawn hian Argentina coach Lionel Scaloni an be thlap nia sawi a ni.