Swiatek chak niah Bouchard hun a liam

Wimbledon champion Iga Swiatek chuan Canadian Open lamah pawh bul a ṭan fuh hle a, tawnhriat nei ṭha Naomi Osaka a chak bawk. Tualchhung nula Eugenie Bouchard erawhin a tennis zinkawng a zawh tawp thung a ni.

Polish nula Swiatek hian Guo Hanyu chu 6-3, 6-1 in a hneh. Wimbledon champion a nih hnuah tournament a khelh lehna hmasa ber a ni a, a khel ṭha leh nghal hle, a khingpui service vawi ruk ngawt a chhuhsak.

Grand Slam vawi li champion tawh Osaka erawh nuamsa taka chak a ni lo thung. Japanese star hian Liudmila Samsonova lakah match point vawi hnih a inchhanhim, a tawpah 4-6, 7-6 (8/6) 6-3 in a chak zawkah a ṭang ta hram.

Osaka chuan, "Samsonova kha hmachhawn a harsa ka ti takzet. Ka ball vuak ṭha tak tak nia ka ngaihte pawh a rawn vaw let thei zel a, a nihna takah chuan a mangan thlak ṭhin khawp mai, a tawpah erawh a vannei zawk ka ni hram," tiin a sawi.

Bouchard erawh a chak lo - Canadian nula hian tennis a khelh ṭanna hmunah a hun hnuhnung a hman tur thu a sawi lawk a, a inkhel lai pawh entu an ṭhahnem ṭhin, thlawptu nei ṭha viau mah se Belinda Bencic lakah 6-2, 3-6, 6-4 in a chak lo.

Canadian nula Bouchard chuan, "Ka tan chuan Montreal-a inkhelh hi chu a nuam danglam bik em em ṭhin. Naupang ka nih laiin helai hmunah hian inkhel ka en ṭhin a, ka puitlin hnuah tennis ka khelh bul ṭanna hmun a ni bawk.

"Tennis zinkawng ka zawh kual a, hmun hrang hranga ka inkhelh hnuah pawh Canadian Open hi chuan ka thinlungah hmun pawimawh a chang reng ṭhin, a tawpah chuan ka chhawr chhuahna hmunah bawk a tawp hun ka hmang," a ti.

Inkhel dangah Canadian Open vawi hnih champion tawh Jessica Pegula chu a chak - Pegula hian Maria Sakkari chu 7-5, 6-4 in a hneh. Australian Open champion Madison Keys pawhin a bul ṭan nan Laura Siegemund chu 6-2, 6-1 in a hneh ve bawk.