Bagan player ṭha ber Apuia

Indian Super League Cup leh Shield nomawi chawitu Mohun Bagan Super Giants chuan season hman zawh taka an player ṭha berah Lalengmawia Ralte (Apuia) an puang a, Mizo midfielder tan season duhawm bik a ni.

Apuia hian season hmasa ṭan dawn khan Mumbai City chhuahsanin, Mohun Bagan hi a zawm a, hmun pawimawh chang nghalin, inelna hrang hrangah match 27 a khel a, goal khat a khung.

Vaivakawn tlangval goal khung chhun erawh goal pawimawh bik a ni a, ISL semifinal-ah hun pek belhah Jamshedpur laka khungin, final an luh theih phah a ni.