Chelsea-in Hato la dawn

Club World Cup champion Chelsea chuan Ajax defender Jorrel Hato an la lut dawn a, a man hi pound maktaduai 37 niin, a khelh ṭhat dan a zira pek belh tur a la awm bawk.

Kum 19 mi defender hian kum sarih atan contract a ziak ang a, kum 2032 thleng Stamford Bridge-ah a cham dawn tihna a ni - Ajax chuan an player hi medical nei tura London a pan an remtihsak tawh.

Hato hian February 2023 khan kum 16 leh ni 335 mi niin, Ajax tana a match hmasa ber a khel a, an club tana Dutch league-a inlan thei naupang pathumna a ni phak hial.

Ajax academy chhuak Hato hian Dutch club tan match 111 khelin, goal li a khung bakah assist vawi kua a nei. Hato hian kum 2023 khan Netherlands tana a match hmasa ber khelin, ram tan vawi ruk a inlan tawh.

Blues hian RB Leipzig player Xavi Simons an dawr mek bawk a, hetihlai hian Christopher Nkunku leh striker Nicolas Jackson te hralh an pawi ti lo.

Coach Enzo Maresca-a mamawh loh player zingah Raheem Sterling, Ben Chilwell, Renato Veiga, Axel Disasi, Carney Chukwuemeka, Armando Broja leh Lesley Ugochukwu te ho chuan a hranpain training an nei mek bawk.