Liverpool-in tour nei zo

Asia-a tour nei mek Liverpool chuan an pre-season tour chu chak result nen an chingfel thei ta a, Nilaini zan khan Japanese club Yokohama FM chu 3-1 in an hneh.

Yokohama-a inkhelah hian mualneitu team tan Asahi Uenaka chuan goal hmahruai a khung a, mahse, Liverpool tan pound maktaduai 100 chuang man Florian Wirtz chuan si phurh sutna goal a khung.

Kum 18 mi Trey Nyoni chuan Jeremie Frimpong-a cross chu hmahruaina goal ni turin a khung a, Rio Ngumoha chuan chak nemnghehna a khung zui - kum 16 mi Ngumoha che vel chu hmuhnawm a tling a, a goal khung pawh mimal thiamna leh thawhrah a ni.

Liverpool tan Japanese midfielder Wataru Endo chu bench aṭanga luhtir a ni a, Japan captain hian Virgil van Dijk thlakin, Dutch defender hian captain armband a hlan zui - thawm chu ring tak a ni.

Reds coach Arne Slot chuan, "Wata hi team-in a mamawh anga inher rem thei player kan sawi dawn chuan entirna ṭha tak a ni a, season hman zawh takah khan kan team tan engtiklai pawhin a awm reng.

"League nomawi kan chawi theih chhan pakhat a ni a, Japanese fan-ten khati taka an lawm kha a phu takzet a ni," a ti - Endo hi Liverpool inkhelhna Yokohama khaw chhuak hi a ni a, season hman zawh takah khan Reds tan inelna hrang hrangah match 32 a khel.

Reds hian Japan-a an inkhelh hma hian AC Milan chu Hong Kong-ah 4-2 in an ngam lo a, Japan-ah insiamṭha zuiin, hnehna an chang ve ta.

Liverpool hi UK lam panin an haw zui a, August 4 zanah Athletic Bilbao nen friendly match vawi hnih an khel leh ang a, season thar atana an inbuatsaihna chu a zo ang.

August 10 zanah FA Cup champion Crystal Palace nen Community Shield an inchuh ang a, August 15 zanah season thar atana an league match hmasa ber khelin Bournemouth an mikhual ang.