India-in Xavi a hnar

Barcelona legend Xavi chuan Indian football team enkawl dil mah se, a dilna chu hnawl a ni a, AIFF lamin an duh loh vang hrim hrim ni loin, a hlawh an tlin an rin loh vang a ni.

India hian coach Manolo Marquez nen an inṭhen hnuah, India coach hna a ruah thu hi an puang a, khawvel hmun hrang hrang aṭangin coach 170 zetin Blue Tigers hi enkawl an dil.

AIFF-a dilna thlen zingah Liverpool legend Robbie Fowler leh Harry Kewell, Blackburn Rovers manager hlui Steve Kean te pawh an tel a, rin loh takin Xavi a tel ve nawlh!

Mahse, AIFF technical committee chuan India coach ni thei tur hian hming pathum an chhawp chhuak a, India coach hlui Stephen Constantine, Slovakia boss hlui Stefan Tarkovic leh Jamshedpur FC manager Khalid Jamil te hming chhawpchhuah a ni.

AIFF technical committee zinga mi, a hming tarlan loh chuan, "Xavi hian Indian football team enkawl duh tak tak pawh ni se, ani ang coach ruai tur chuan sum kan mamawh hnem dawn lutuk a ni," a ti.

Xavi hian Barcelona-ah khan kum khatah India pawisain, cheng vaibelchhe 73 bawr vel a hlawh nia sawi a ni a, AIFF tan rawih ngaihna a awm lo. Kum 45 mi coach hian May 2024 khan Barca a chhuahsan a, club enkawl a la nei leh lo - La Liga leh Spanish Super Cup-ah champion nomawi a chawipui.

National team director Subrata Paul chuan, "Xavi-a'n India coach nih a dil tih hi thudik a ni a, coach hna a dilna hi AIFF hnenah email-in a thawn a ni," a ti a, thu lengvak mai a nih loh thu a sawi.

AIFF president Kalyan Chaubey chuan, "Tun hnai ni 10 chhungin India coach tur hi kan puang hman ang," a ti a, India coach thlangtu tur hi AIFF executive committee an ni a, Vanglaini thudawn danin, tun thlengin executive kohna siam a la ni lo thung.