CYMA Futsal 2025: Zanin dar 8:00-ah a pet hawnna

Central YMA leh Mizoram Football Association buatsaih LBS Suzuki Inter Branch YMA Futsal Tournament 2025 pet hawnna chu zanin dar 8:00 hian CYMA Hall, Tuikhuahtlangah neih a ni dawn.

CYMA Futsal hmasa berah hian team 116 an inziak lut a, Hlimen leh Phulbial an inhnuh dawh avangin team 114 an inel ang. Zanin hian fixture tlangzarh a ni dawn a, zan dar 7:00-ah manager meeting a awm bawk ang.

Inelna hi July 28, Thawhṭanni aṭanga ṭan tur a ni a, match zawng zawng hi R. Dengṭhuama Stadium, Mualpuiah khelh tura ruahman a ni.

Dan a khauh

CYMA leh MFA ṭangkawpin hlawhtling takin CYMA Football 2025 an buatsaih a, final-ah Republic Vengin Bethlehem Vengthlang hnehin an champion a, entu mipui sing khat chuang hmaah nomawi an chawi.

CYMA Football-ah dan khauh ṭha tak hman a ni a, CYMA Futsal-ah dan a khauh lehzual. Futsal inelnaah hian veng mi dik tak a ni tih finfiah nan ration card chu belh a ni a, voter ID leh ration card neih kawp a ngai tawh. Ration card hlui hman theih a ni lo a, ration card thar nei lo chu khelh theih a ni lo.

Kum tling lo tan aadhaar card leh ration card hman theih a ni a, aadhaar card hmang thei chin hi kum 2006-a piang chin an ni. Kum 2005 leh a hmalama piang chinin voter ID an nei lo a nih chuan inelna an hmachhawn thei dawn lo. Document-te hi April 2025 hnu lama Transfer-te chu pawm a ni lo bawk.

Screening committee-in team 114 te document a en fel tawh a, document dik lo vanga paih an awm nual a, player paihte hi thlak theih a ni tawh lo. Player-te hian inkhelh niah an document voter ID/aadhaar Card leh ration card an ken ngei a ṭul bawk.