Liverpool-in Ekitike an la lut

Premier League champion Liverpool chuan Hugo Ekitike an la lut fel ta a, kum 23 mi striker hi Eintracht Frankfurt aṭangin pound maktaduai 69-in an la lut - a khelh ṭhat dan a zirin £10mtd pek belh tur a ni ang.

French striker hian Anfield-ah kum ruk khel turin contract a ziak a, Liverpool-in an lakluh thu an puan hnu hian pre-season tour nei mek Reds squad chu Hong Kong-ah a zawm ve nghal.

Ekitike hi a number hak tur zat a la chiang lo a, pre-season tour bikah hian number 54 a ha phawt ang - hei erawh season ṭan dawn tak takah chuan thlak leh tur a ni.

Frankfurt sporting director Markus Krosche chuan, "Kan hnena kum khat leh a chanve lek a awm chhungin, Hugo hian nasa takin hma a sawn a, khelmual chhung leh pawnah team tana mi ṭangkai a ni.

"Hetiang dinhmun a thleng thei hi ka lawmpui a, kan tana a khelh ṭhat em vanga tun dinhmun hi thleng a ni," a ti a, an player-in Premier League champion a zawm thei chu an lawmpui thu a sawi.

Ekitike hi Newcastle United pawhin £70mtd-in an lo dawr tawh a, tunah erawh Reds player a ni ta. French club Reims aṭanga bul ṭantu Ekitike hian Danish club Vejle Boldklub (loan) leh Paris Saint-Germain tan pawh a khel tawh.

French club-ah hmun a chang phak lo a, loan-in Frankfurt a zawm zui - season chanve loan-a a khelh hnuah a nghetin a zawm a, season hman zawh takah khan inelna hrang hrangah match 48 khelin goal 22 a khung a, assist vawi 12 a nei.

Bundesliga bikah goal 15 khungin, assist vawi riat a nei a, a club hi pathumna a nihpui - team of the season-ah a lang. Season hman zawh takah khan league-ah shot vawi 117 a nei a, mahse, 12.8% chiah khungin, 'finishing' lam chu zir a la ngaih hmel!

Liverpool hian tun nipuiah player lei nan £250mtd chuang an seng ta. Ekitike hma hian Bayer Leverkusen right back Jeremie Frimpong (£29.5mtd) leh attacking midfielder Florian Wirtz (£100mtd + £16mtd), Bournemouth left back Milos Kerkez (£40mtd), Puskás Akadémia keeper Ármin Pécsi (£1.5mtd) leh Preston North End keeper Freddie Woodman (free transfer) te an la lut tawh.

Valencia keeper Giorgi Mamardashvili (£25mtd) erawh tun nipuiah Reds hi zawm mah se, season hmasa lama inremna an lo neihpui tawh sa a ni.