Arsenal player thar Madueke a zin ve lo

Premier League season thar inbuatsaih turin Arsenal chu Asia khawmualpui lamah an zin chhuak ta a, player 30 zin zingah Chelsea aṭanga an lak thar Noni Madueke a tel ve lo - Club World Cup khel zo hlim hi a chawl rih dawn a ni.

Kum 23 mi Madueke hian pound maktaduai 48.5-in Arsenal hi a zawm a, kum nga chhung daih inremna an ziak. Emirates Stadium-ah hun a hman ṭhat dan a zirin, a man hi pound maktaduai 50 thlenga sang chho thei tur a ni bawk.

England winger Madueke chuan, "Arsenal ka zawm theih nana hma latu, tha thawhtu zawng zawng chungah ka lawm. Ka lakah rinna an nghat a, min rin ang ngeia chhanna pek hi ka châk tawh, khelmual chhungah a chhanna chu ka pe ang," a ti.

PSV Eindhoven tan pawha khel tawh Madueke hian Chelsea tan match 92 a khelhsak hman a, goal 20 khungin season hmasa khan Europa Conference League champion a nih pui - Club World Cup khel leh mah se, inelna zawh hmain Gunners zawm turin a hawsan.

Nipui bazara che na tak Arsenal sporting director Andrea Berta chuan, "Noni Madueke hi player ṭha leh hmabak nei êng tak, tlarhma lamah chuan chhawr kual theih, ball a thiam bakah tharum a ngah bawk. Ani angin min zawm thei hi thil lawmawm tak a ni," tiin a sawi.

Madueke hi mual ding lama khel ṭhin a ni a, Premier League a khelh tawh zawng zawng minute zat chawhrual pawhin 88% chu mual ding lamah hun a hmang; a khelh thiamna hi Bukayo Saka awmna hmun a ni ve bawk.

Kum 23 mi Saka hi Gunners fachuam a ni a, khawih chet theih loh tluk a ni. Kum 2021-22 season aṭanga chhiar khan, league match 114 a khelh zinga 108 zetah bul ṭantu a ni, a dam phawt chuan hmun pawimawh a chang ziah tihna a ni.

Mahse, England forward hi hliam thei leh khel ṭha lo thei a ni ve tho. Season hmasa pawh khan hliam vangin thla thum chhung a khel thei lo, malpui hliam vanga a chawlh chhung hian a hmun ruak hnawh khat thei an awm lo.

Madueke hi Saka thachhang dawltu tur a nih a rinawm a, chutihrualin mamawh hunah chuan mual vei lamah a khel thei bawk. Coach Mikel Arteta tan tlarhma lamah duh thlan tur an tam sawt dawn tihna a ni, chanchin ṭha a ni ngei ang.

Mikel Arteta chuan, "Noni hi kum 23 mi chauh la ni mah se tawnhriat a ngah tawh hle, club leh ram tan sulhnu a nei ṭha tawh. Premier League hrechiangtu a ni a, inelna sang taka khel thei tur player kan neih belh," tiin a sawi.

Asia ramah Madueke hi zin ve rih lo mah se, tun nipui bazar laia an lak Kepa Arrizabalaga, Martin Zubimendi leh Christian Norgaard te chu an zin chhuak tawh a, season thar inbuatsaihna a bul aṭangin an zawm nghal.

North London club hian National Stadium, Singapore-ah Nilaini hian AC Milan an hmachhawn dawn, chumi hnuah Newcastle United leh Tottenham Hotspur te an hmachhawn leh dawn bawk a ni.

Arsenal Squad (Asia Tour 2025):

Goalkeepers: David Raya, Kepa Arrizabalaga, Tommy Setford, Alexei Rojas-Fedorushchenko.

Defenders: William Saliba, Ben White, Gabriel Magalhaes, Jurrien Timber, Jakub Kiwior, Oleksandr Zinchenko, Riccardo Calafiori, Myles Lewis-Skelly, Josh Nichols, Marli Salmon.

Midfielders: Martin Odegaard, Christian Norgaard, Mikel Merino, Sambi Lokonga, Martin Zubimendi, Declan Rice, Louie Copley.

Forwards: Bukayo Saka, Gabriel Martinelli, Leandro Trossard, Ethan Nwaneri, Reiss Nelson, Kai Havertz, Ismeal Kabia, Max Dowman, Andre Harriman-Annous.