Marquez-a'n a him theih chhan a sawi

Marc Marquez chuan mi tam tak an chetsualna karah him taka inelna a hmachhawn zo thei chu a lawm thu a sawi a, tun hma lama a lo chetsual tawhna aṭangin thil tam tak a zir chhuak tih a sawi bawk.

Inelna hnuhnung ber 2025 MotoGP German Grand Prix-ah chesual an tam, a tirah inelna hmachhawn tu rider 18 an tel a, chung zinga 10 chauhin inelna an tlan tluan thei, pariat ngawt an tlan tluan thei lo tihna a ni.

Rider championship hmahruaitu Marc Marquez chuan, "Kawng kawi hmasa ber aṭang khan chetsual theihna a awm nghal a, rilru fim leh fimkhur taka chet a ngai a ni tih pawh ka hre nghal, chuvangin tlan chak piah lamah fimkhur a ngai tel tih kha ka chiang.

"Lap hmasa ber kan tlan zo a, a hnu lawkah chesual an awm a ni tih ka hmu nghal. Chesual an awm tih ka hriat khan ka fimkhur phah lehzual, tun hma khan midang chetsualnain min nghawng tawh a, chuvangin rilru fim phut a ngai ṭhin.

"Ka tan chuan MotoGp vawi 200 ka tlan tlinna a ni a, hnehna chan bawk kha a hlu lehzual. Ka tan chuan Sachsenring tlankawng kha hmun nuam leh hriatreng tawh tur a ni, kumina beiseina min siamtu a ni tel bawk," a ti.

Bike intlansiakna sang berah Marquez hian fal takin hma a hruai mek a, ban ruh tliak vanga hun rei tak a buai hnuah rawn kir lehin ngai a awh chho leh mek tawh a, champion tur pawhin a dinhmun a ṭha leh ta hle.

Pathianni tlai dar 5:30 hian Masaryk Circuit-ah Czech Republic Grand Prix an tlan leh dawn a, rider championship hmahruaitu Marquez leh a nau Alex Marquez te chuan enbik an hlawh leh ang.