Sinner leh Alcaraz tan US a pawimawh

North America lamah tennis inelna an chhunzawm dawn a, mipa world number 1 Jannik Sinner chu a hnuaia mi Carlos Alcaraz tan umphak theih dinhmunah a ding, hard court season an hman leh tur hi an pahnih tan a pawimawh dawn hle.

Ranking thar berah Wimbledon champion Sinner-a'n point 12,030 hmuin a chung berah a awm chhunzawm, pahnihna Alcaraz aia a sanna chu point 3,430 lai a ni, an inkar hi zau angreng viauin lang mah se North America hian a nghawng che dawt thei dawn.

Canadian Open, Cincinnati Open leh US Open an khel dawn, heng inelna pathumah hian Sinner tana ranking point hum ngai chu point 3,200 a tling. Hetihlai hian Alcaraz erawhin point hum tur 60 chauh a nei thung!

Season hmasa khan Sinner hi a che ṭha, hei vang hian ranking point hum tur a ngah. Alcaraz tan erawh hmuh belh tur lam a ni thung a, hei vang hian tunah an point inthlau angreng viau mah se US Open an khelh zawh meuh chuan a danglam duai thei dawn a ni.

Nikum khan Alcaraz hian Canadian Open a khel lo a, hei bakah hian Cincinnati-ah hneh nei loin a tla; US Open-ah pawh second round a paltlang lo, hei vang hian kuminah chuan point hmuh belh theihna remchang a nei ang.

Italian tlangval Sinner tan point hum tur a tam a ni mai thei, hei erawh hriat tel a ngai - season hmasa a hman ṭhatna hmun a nih avangin kuminah pawh a tan chet ṭhat leh theihna kawng a inhawng zau tihna a ni.

Italian tennis player zingah Sinner hi world number 1 ni thei hmasa ber a ni a, a chung berah hian chawlhkar 58 chhung a awm tawh. Thla thum chhung hrem a ni chung pawhin midangin an tlanpel hman lo, a nghet ṭha tawk hle tih a chiang.