Sabalenka a hahchawl rih dawn

Hmeichhe tennis world number 1 Aryna Sabalenka chuan hahchawlh rih a duh a, tun season chhunga Grand Slam hnuhnung ber US Open atan inbuatsaihna hun thawl zawk neih a duh avangin National Bank Open aṭangin a inhnukdawk.

Belarus nula Sabalenka chuan, "North America khawmualpuia inelna hmachhawn leh ka châkin ka nghakhlel a, rilru leh taksa pawh a inbuatsaih nasa. Mahse, season kan hman rei tawh avangin ka tana ṭha ber tur ka ngaihtuah tel a ngai.

"Tournament ka khel hnem em em a, hmabak kan la ngah bawk. Ka taksa dinhmun ngaihtuahin Montreal lama inkhelh loh rih mai a ngai, chutiang tur chuan thu pawh ka titlu ta zawk a ni," tiin a inkhelh rih loh tur thu a sawi chiang.

National Bank Open hi July 27 aṭanga khelh tur a ni a, world number 1 Sabalenka hi a inlan lo a nih chuan hahchawlhna hun a nei rei hret dawn tihna a ni. August thlatir lama khelh tur Cincinnati Open-ah erawh a inlan ngei a ngaiin a rinawm.

Tun season chhunga Grand Slam hnuhnung ber US Open hi August 24 aṭanga khelh ṭan a ni dawn. New York khawpuia inelna lianah hian Sabalenka hi champion lai a ni a, kuminah a nomawi humhim ngei a tum dawn a ni.

Wimbledon khelh zawh takah khan Sabalenka hian semifinal a thleng a, mahse player langsar lo zawk Amanda Anisimova lakah a chak lo. Tunah chuan a rilru leh taksa a hahchawlh tir a ngai a, ṭha zawka rawn kir leh a tum ang.

Sabalenka ang bawkin Paula Badosa chu National Bank Open an khelh tur aṭang hian a inhnukdawk a, anni pahnih inlan dawn loh avang hian Caty McNally leh Moyuka Uchijima te chuan main draw an khelh nghal theih phah dawn a ni.