Messi-a'n goal a khung ta lo!

Major League Soccer khelh laia match nga chhung goal a khung hnuah Lionel Messi chuan a khung ta lo - nimin zing khan Inter Miami chu FC Cincinnati lakah 3-0 in an chak lo a, an captain Messi-a goal khung tluang lai chu a tawp ve nghal a ni.

Kum 38 mi Messi hian a zawnin match nga chhung goal a khung a ni satliah lo a, goal hnih a khung tling zel. Mahse, a goal khung kaltlang lai hi a chhawmnung rei thei ta bik lo a, an khingpui Cincinnati lamin Messi leh Miami an veng thei tlat.

Cincinnati tan hian midfielder Gerardo Valenzuela chuan a khung ṭan a, Brazilian striker Evander chuan an goal hnihna leh chak nemnghehna atan a vawi thumna a khung a, an mikhual team lakah harsatna lian tham tawk loin hnehna an chang.

Inter Miami hian Club World Cup an khel a, an elpui dangte aiin MLS match an khel tlem deuh. Match 20 an khelh aṭanga point 38 hmuin Eastern Conference table-ah pangana an ni mek a, an chunga awmte aiin match thum ngawtin an khel tlem thung a ni.

Messi awmna Miami hian an squad tihchhah zel an tum - Rodrigo De Paul an la lut dawn niin khawthlang chanchinbute chuan an tarlang. Argentine midfielder De Paul hian Atletico Madrid chhuahsanin Miami hi a zawm ang a, inremna la ziak chiah lo mah se a zawm ngei hmel.

Inter Miami hian European football lama hlawhtling tawh - Sergio Busquets, Luis Suarez leh Jordi Alba te an nei sa bawk a, an vanglai pel deuh tawh mah se theihna sang tak an la nei - MLS club dang tana elpui hautak leh huphurhawm an la ni phak dawn a ni.