Hmeichhe man to Olivia Smith!

Liverpool hmeichhe team forward Olivia Smith chu khawvela hmeichhe footballer man to ber a ni ta - Canada international hian Reds chhuahsanin, Arsenal a zawm a, a man zat hi pound maktaduai khat a ni.

January khan Chelsea chuan USA defender Naomi Girma chu San Diego Wave aṭangin £900,000-in an lei a, hmeichhe footballer man to ber a ni - he record hi Olivia Smith chuan a khum a, mipa football nen erawh khaikhin rual a la ni lo.

Kum 20 mi forward chuan, "Arsenal ka zawm thei hi ka tan chuan thil lawmawm leh chawimawina ropui tak a ni. England-a title hlu ber leh Europe-a nomawi ngaihhlut ber chawi hi ka duhthusam a ni a, Arsenal tan tha thawh a, chumi kawng ka zawh thei tur hi ka lawm a ni," a ti.

Canada tan kum 15 mi lek ni chunga a match hmasa ber khel thei Smith hian kum 2023 aṭang khan professional football a khel ve chauh a, season hmasa ṭan dawn khan Sporting Lisbon aṭangin Reds hi £200,000-in a pan a, club record fee a ni.

Women's Super League-a a season hmasa berah match 20 khelin goal sarih a khung a, pasarihna ni chungin season an khar - Reds hian February khan manager Matt Beard an ban zui a, Manchester City boss Gareth Taylor nen sawizawm mek an ni.

Liverpool-in coach an neih loh laiin Smith erawh Champions League nomawi chawitu Arsenal lam panin a chhuak ta a, kum li chhung atan contract a ziak.

Arsenal head coach Renee Slegers chuan, "Player hmabak nei êng tak a ni a, team tan a thawhhlawk dawn," a ti a, hmeichhe footballer zinga £1mtd man ni hmasa ber chu a fak.

Mipa footballer zinga £1mtd-a lei hmasak ber chu Trevor Francis a ni a, English forward hi kum 1979 khan Nottingham Forest chuan Birmingham City aṭangin an lei chhuak.