Bellingham-a'n season ṭan thei dawn lo

Real Madrid midfielder Jude Bellingham chuan rei tak a buaina lo ni tawh a dar hliam chu a zai a, hlawhtling taka zai ni mah se, hahdam tura hun a duh dawn avangin season bul a ṭan thei dawn lo.

Bellingham hian kum 2023 aṭang tawh khan a dar hliam hi a buaipui a, mahse, a zaitir lawk lo. Tun season chawlhah a zaitir ta a, Real pre-season bakah, season ṭantir kar ruk chu a chawlh a ngai dawn.

Kum 22 mi midfielder inzai hi Real chauhin an tuar dawn lo a, an ram England chuan September-ah World Cup qualifier khelin Andorra leh Serbia an hmachhawn dawn a, Bellingham an chhawr thei dawn lo.

Bellingham hi rei tak chu a darah 'strapping' vuah chungin a inkhel ṭhin a, mahse, June thla khan English midfielder hian, "Hetiang vuah reng chunga inkhelh hi ka ning tawh," tiin a sawi a, Real chuan Club World Cup zawha inzai turin ruahmanna an siam.

Ruahman angin hlawhtling taka zai a ni a, training a zawm hmain a inenkawl dam phawt thung dawn a ni. Borussia Dortmund midfielder hlui hian kum hnih liam ta khan German club aṭang hian Real hi pound maktaduai 115-in a zawm a, a hlawhtling hle.

Real-a a season hmasa berah match 43 khelin goal 23 a khung a, assist 13 a nei - Champions League leh La Liga nomawi a chawi nghal. Season hman zawh takah khan match 58 khelin goal 15 a khung a, assist 15 nei telin, nomawi chawi erawh an nei lo.