Tuikual South leh Zarkawt ten final an lut

LESDE MBBA Inter Veng Basketball Tournament-ah Tuikual South-in final lut turin Nursery chu 87-77 in an hneh hram a, Zarkawt erawhin semifinal-ah harsatna an tawk lo. July 16, Nilaini zan khan final khel tur zawnna hi R. Dengṭhuama Stadium-ah neih a ni a, Zarkawt hian Dawrpui Vengthar chu 73-59 a hnehin final an lut ve bawk.

Semifinal hmasa zawkah Tuikual South leh Nursery te an inkhel a, team pahnih an inhnehtawk hle. Nursery lamah Emmanuel, Miller leh Hlimpuia te an che ṭha a, TKS lamah Dodo-a, Faka leh Jeptha te an ṭangkai a, Dina tawnhriat a pawimawh viau bawk.

Halftime-ah 39-39 a ni a, third quarter-ah Nursery an khel ṭha zawk a, 64-58 in hma an hruai. Mahse, quarter tawp berah Tuikual South-in an tawnhriat neih ṭhat an hmang ṭangkai a, Dina pass ṭha Jeptha-a'n a luh hnuah TKS-in an lethal a, an hawikir tawh lo. Dina ball pek a ṭha ringawt lo a, amah pawhin hun pawimawh lai takin point hlu bik a nei a, a tawp meuh chuan 87-77 in an chak.

Semifinal hnuhnung zawkah Zarkawt leh Dawrpui Vengthar te inkhel ṭantirh lamah inhnehtawk deuh mah se quarter tinah Zarkawt an chungnung hret hret a, harsatna lian tham an tawk lo. Quarterfinal-ah Zarkawtin champion rinkai Bungkawn an hneh a, hei vang hian inrintawkna an neih ngah phah bawk.

Zarkawt tan Matthew bakah Sangkima, Rema leh Laldina te an khel ṭha. Hei chauh hi a ni lo a, Zarkawt hian Chanmari vanglaia score thei zet Rempuia kha an nei a, kum lamah upa tawh mah se a len leh a luh theihna a la ṭangkai a, semifinal-ah pawh khelh ṭha ber zinga mi a ni.

Final-ah pawh squad chhah ṭha zawk Zarkawt hi champion tura rinkai an ni a, player theihna nei sang Matthew, Hnehpuia leh Sangkima te thlawp tura tawnriat nei ṭha leh champion thiam Rempuia an neih avangin chak turin an buk a rit hle. Mahse, veng inelnaah chuan squad a chhah tak tak thei lo a, player huaisen bik Dina hi danglamna a siam thei a. Tuikual South-in Dina thlawp turin Faka, Dodo-a leh Jeptha te an nei a, final hmuhnawm bik a ni thei ang.