Bethlehem Vengthang an sang zel
Bethlehem Vengthlang FC-in nimin tlai khan Ramhlun North 2-0 in an hneh a, Mizoram Premier League Season 5 hmahruaitu an ni chhunzawn zel.
Lalbiaksanga Colney hoten point 23 an hmuh tawh avangin an inkhelh leh hauh hmain result dang a zirin semifinal lut thei dinhmunah an ding. Ramhlun North erawh point an hmuh loh avangin table mawgphaha awm Zo United nen an inthlauhna chu point li chauh a ni thung.
Lammual inkhelah hian BVT tan Lal-rammuanpuia (Apuia) leh Lalmawizuala ten goal an khung a, goal hmasa zawk hi penalty niin sawi zui a hlawh hle.
A nung lo
Bethlehem Vengthlang FC-in an khingpui Ramhlun North insiamrem hmain chance buai nuaih karah goal khung theihna tur an nei a, keeper Liansangpuia tan buaina tham a tling lo. MPL kaitharin Onyeama Francis hmangin BVT an rum ṭhaih lehnghal a, Nigerian striker hian la lut ṭha mah se a tawp a khar thei lo.
Club pahnihin goal chance ṭha tak nen inkhel bul ṭan ve ve mah se inkhel erawh a hmuhnawm zui lo a, hun chanve hma lam inkhelin entu mipui mit a ti tlai zo lo.
A nung ta
BVT coach Lalbiaksanga Colney-in inkhel thlak danglam tumin Samson Ramengmawia leh PC Zosanga te second half ṭan phatah a luhtir nghal a, hemi hnu lawk hian Ramhlun North-in Lalchhanchhuaha Fanai leh Vanlalthlamuana te luhtir ve bawkin inkhel a nung sawt.
Minute 70-naah Laldinlana Varte-in ṭha taka a lakluh hnuah substitute PC Zosangliana a pe a, BVT forward hian la fuh tawk lo mah se Ramhlun North keeper Liansangpuia'n a tihtluk avangin penalty a hlawh tho. Armed Veng South tlangval Apuia rawn pen chhuakin goal-ah a chantir a, BVT forward tun season-ah goal li a khung ta bawk.
Ramhlun North-in goal hlauawm chu nei bawk mah se BVT-in substitute Samson hmangin midfield an thunun a, injury time-ah BVT tlangval Lalmawi-zuala'n chak nemnghehna goal mawi tawkin a khung leh bawk.
Lawm lo leh lawm
Ramhlun North coach Lalruatliana Sailo chuan, "Referee hi zah hle mah ila ka sawi duh chu referee khan replay en rawh se, kei pawhin ka lo en ang. Penalty pek theih loh tawp chu ka ti lo a, 70% aia tam chuan penalty an pe lo ang," tiin penalty vanga chak loh an nih thu a sawi.
BVT coach BS-a chuan, "Kan chak avangin ka lawm a, semifinal lut chiang ti-tih tawh mah ila chak tumin kan khel zel ang. Attacking football khelh hi kan duh dan a ni," a ti. An penalty hmuh chu, "Last man-in a titlu a, penalty chiang tak a ni a, sawisel chi a ni lo," a ti ve thung.
Tute nge inlan?
Ramhlun North (4-2-3-1) : Liansangpuia; Lalmalsawma, Lalramthlamuana, C. Ramdinmawia, Lalmuanawma; Zosangliana, Lalchhuanpuia; Isaac Lalruatpuia (Jerry F. Zonunsanga 78'), B. Malsawmzuala (Lalchhanchhuaha Fanai 57'), David Lalrinchhana (Vanlalthlamuana 62'); Onyeama Francis.
Bethlehem VT (4-4-1-1) : Malsawmdawngzela; K. Lalmalsawma, PC Laldinpuia, H. Lalhlimpuia, Lalhruaitluanga; Laldinliana Varte, Zosangkima (Samson Ramengmawia 46'), Lalmawizuala, Lalzatluanga (PC Zosanga 46'); Lalrammuanpuia; Lalnunmawia.
ZoFooty Statistics
Ramhlun North 0 - 2 Bethlehem VT
BVT : Lalrammuanpuia 70'(P); Lalmawizuala 90+4'
MoM: PC Laldinpuia, BVT
52% Ball Possession 48%
14 Shots 12
4 On Target 7
2 Yellow Cards 2
0 Red Cards 0
Powered By Rainbow Multibrand
Mobile Showroom
Team Dinhmun
# Team Pld W D L GF GA GD Pts
1 Bethlehem VT 11 7 2 2 12 8 4 23
2 Chanmari FC 10 5 4 1 18 9 9 19
3 Chanmari West 10 5 1 4 13 9 4 16
4 Aizawl FC 10 5 1 4 9 6 3 16
5 Dinthar FC 10 2 5 3 11 15 -4 11
6 Ramhlun North 11 3 2 6 10 16 -6 11
7 Chhinga Veng 10 2 3 5 13 15 -2 9
8 Zo United 10 1 4 5 5 13 -8 4